ମନରେଗା ଦୁର୍ନୀତି ମାମଲାରେ ୩ ଜଣଙ୍କୁ ଇଡିର ନୋଟିସ୍

ଯଶିପୁର (ବଡ଼ ଖବର ବ୍ୟୁରୋ):୨୦୨୦ ମସିହାରେ ହୋଇଥିବା ବହୁ ଚର୍ଚ୍ଚିତ ଯଶୀପୁର ବ୍ଲକର ୩ କୋଟି ୨୧ ଲକ୍ଷ ଟଙ୍କାର ମନରେଗା ଦୁର୍ନୀତି ମାମଲାରେ ୨୫ ଜଣ ଅଭିଯୁକ୍ତଙ୍କ ମଧ୍ୟରୁ ୩ ଜଣଙ୍କୁ ଇଡିର ନୋଟିସ୍ । ଆସନ୍ତା ୨୦ ତାରିଖ ଦିନ ଇଡିରେ ହାଜର ହେବାକୁ ନିର୍ଦ୍ଦେଶ ରହିଛି । ୨୦୨୦ ମସିହାର ଯଶୀପୁର ବ୍ଲକ୍ ର ପୋଡ଼ାଗଡ, ବରେହିପାଣି, ଅସ୍ତକୁମାର, ଗୁରୁଗୁଡ଼ିଆ ଓ ଧଳାବଣୀ ଗ୍ରାମପଞ୍ଚାୟତରେ କୌଣସି ଉନ୍ନୟନ ମୂଳକ କାର୍ୟ୍ୟ ନହୋଇ ମୋନରେଗା ଯୋଜନାରେ ୩ କୋଟି ୨୧ ଲକ୍ଷ ଟଙ୍କା ଆତ୍ମସାତ ହୋଇଥିବା ଖବର ବିଭିନ୍ନ ଗଣମାଧ୍ୟମରେ ପ୍ରକାଶିତ ହେବା ପରେ ତତ୍କାଳୀନ ଯଶୀପୁର ବ୍ଳକ୍ ବିଡ଼ିଓ ଅନୁପମା ଘୋଷ ଏହି ଦୁର୍ନୀତିରେ ଜଡ଼ିତ ଥିବା ୨୫ ଜଣ ଅଭିଯୁକ୍ତଙ୍କ ନାମରେ ଯଶୀପୁର ଥାନାରେ ଏକ ଲିଖିତ ଅଭିଯୋଗ କରିଥିଲେ । ସେମାନଙ୍କ ମଧ୍ୟରୁ ତତ୍କାଳିନ ସହକାରୀ ଯନ୍ତ୍ରୀ ରାଜେନ୍ଦ୍ର କୁମାର ପାତ୍ର, କନିଷ୍ଠ ଯନ୍ତ୍ରୀ ଦିବ୍ୟଲୋଚନ ନାୟକ(ବର୍ତ୍ତମାନ ବୌଦ୍ଧ ଜିଲ୍ଲାର କଣ୍ଟାମାଳ ବ୍ଲକ୍ କନିଷ୍ଠ ଯନ୍ତ୍ରୀ)ଓ ପଡାଗୋଡ ର ତତ୍କାଳୀନ କନିଷ୍ଠ ଯନ୍ତ୍ରୀ(ବର୍ତ୍ତମାନ କେନ୍ଦୁଝର ଜିଲ୍ଲାର ସଦର ବ୍ଲକ୍ କନିଷ୍ଠ ଯନ୍ତ୍ରୀ)ସମୀର କବିଙ୍କୁ ଇଡି ନୋଟିସ୍ ଜାରି କରିଛି । ତେବେ ବାକି ଥିବା ଅନ୍ୟ ୨୨ ଜଣ ଅଭିଯୁକ୍ତଙ୍କୁ କେବେ ଇଡି ର ଡାକରା ଆସୁଛି ତା ଉପରେ ସମସ୍ତଙ୍କ ନଜର ରହିଛି ।