ଭୁବନେଶ୍ୱର (ବଡ଼ ଖବର ବ୍ୟୁରୋ):ଦୁଇ ଅନାଥ ପିଲାଙ୍କୁ କୋଳେଇ ନେଲେ ବିଦେଶୀ ଡାକ୍ତର ଦମ୍ପତି । ଯାଜପୁର ଜିଲ୍ଲା ବୁଢ଼ାକେନ୍ଦୁଆ ସ୍ଥିତ ନେସନ୍ ଅନୁଷ୍ଠାନରେ ପହଞ୍ଚି ଥିଲେ ସୁଦୂର କର୍ଲିଫର୍ଣ୍ଣିଆର ଡାକ୍ତର ଦମ୍ପତି ଷ୍ଟିଫେନ ଥାଡିଅସ ଓ ଫତିମା ନଥାନ ଫଙ୍କ। ଉଭୟେ ଦୁଇବର୍ଷ ତଳୁ ଏହି ଅନୁଷ୍ଠାନରୁ ଦୁଇଟି ପିଲାଙ୍କୁ ପୋଷ୍ୟ ସନ୍ତାନ ଭାବେ ଗ୍ରହଣ କରିବାକୁ ଆବେଦନ କରିଥଲେ। ସରକାରୀ ଭାବରେ ଅନୁମତି ମିଳିବା ପରେ ସେମାନେ ନେଶନ ଶିଶୁ ଯତ୍ନ କେନ୍ଦ୍ରରେ ପହଞ୍ଚିଥିଲେ।
ଅନୁଷ୍ଠାନର ତତ୍ତ୍ୱାବଧାରକ ପ୍ରଦ୍ୟୁମ୍ନ ପାତ୍ର ତାଙ୍କୁ ସ୍ବାଗତ କରିବା ପରେ ଅନୁଷ୍ଠାନ ପରିସରରେ ଭାବ ବିହ୍ବଳ ପରିବେଶ ସୃଷ୍ଟି ହୋଇଥିଲା । ପିଲାଙ୍କ ଉଜ୍ବଳ ଭବିଷ୍ୟତ ଦେଖି ଅନୁଷ୍ଠାନର କର୍ମକର୍ତ୍ତା ଖୁସି ହେଉଥିବା ବେଳେ ସହପାଠୀମାନେ କିନ୍ତୁ ଆଖିରୁ ଲୁହ ଝରାଉଥିଲେ। ନେଶନ ପରିସରରେ ଦୀର୍ଘ ପାଞ୍ଚ ବର୍ଷ ହେବ ସ୍ନେହ ଶ୍ରଦ୍ଧା ପାଇ ବଢି ଆସିଥିବା ଝରଣା ଗାଗରାଇ ( ୧୧) ବାଦଲ ଗାଗରାଇ (୮) ଙ୍କୁ କୋଳେଇ ନେଇଥିଲେ ବିଦେଶୀ ଦମ୍ପତି।
