୧୨ କୋଟି ଟଙ୍କାର ଗଂଜେଇ ନଷ୍ଟ
କୋରୁକୋଣ୍ଡା(ବଡ଼ ଖବର ବ୍ୟୁରୋ): ମାଲକାନଗିରି ଜିଲ୍ଲା ଅବକାରୀ ବିଭାଗ ଓ ପୋଲିସ ଦ୍ୱାରା ଚିତ୍ରକୋଣ୍ଡାରେ ଚଢ଼ାଉ କରି ୧୨କୋଟିରୁ ଉର୍ଦ୍ଧ୍ୱ ଟଙ୍କାର ଗଂଜେଇ ଗଛ ନଷ୍ଟ କରାଯାଇଛି । ଆଜି ସକାଳେ ଅବକାରୀ ବିଭାଗ ସୁପରିଟେଣ୍ଡ ଅଶୋକ କୁମାର ସେଠିଙ୍କ ନେତୃତ୍ୱରେ ଓ ତାଙ୍କ ସହକର୍ମୀ ଏବଂ ଚିତ୍ରକୋଣ୍ଡା ପୋଲିସ ମିଳିତ ଅଭିଯାନରେ ଚିତ୍ରକୋଣ୍ଡା ବ୍ଲକ ଅନ୍ତର୍ଗତ ଆର୍ଏସି-୪, ବଡ଼ପୁଟ, ପେଟାଲ, ଆର୍ଏସି-୧ ଗ୍ରାମ ଗୁଡିକରେ ପ୍ରାୟ ୭୫ ଏକର ଜମିରେ ବେଆଇନ ଚାଷ କରାଯାଇଥିଲା ।
୧ଲକ୍ଷ ୨୩ହଜାର ୭୫୦ ଗଛ କଟାଯାଇ ପୋଡି ନଷ୍ଟ କରାଯାଇଛି। ଏହାର ଆନୁମାନିକ ମୂଲ୍ୟ ୧୨କୋଟି ୩୭ଲକ୍ଷ ୫୦ହଜାର ହେବ ବୋଲି ଅବକାରୀ ବିଭାଗ ପକ୍ଷରୁ କୁହାଯାଇଛି । ଜିଲ୍ଲାରେ ଏଭଳି ଚଢାଉରେ ଗଂଜେଇ ବ୍ୟବସାୟୀଙ୍କ ମଧ୍ୟରେ ହଲଚଲ ସୃଷ୍ଟି କରିଛି । ଚଢ଼ାଉ ବେଳେ ମାଲକାନଗିରି ଅବକାରୀ ବିଭାଗର ଇନ୍ସପେକ୍ଟର ଗଙ୍ଗା ପାଇକରାଏ , ଓଆଇସି ଏଚ.ଜଗା ରାଓ , ଏସ.ଆଇ ଦିଲୀପ କୁମାର ନାୟକ , ସଞ୍ଜୟ କୁମାର କାଣ୍ଡି ଓ ଅନ୍ୟ କର୍ମଚାରୀମାନେ ସହଯୋଗ କରିଥିଲେ ।