ସମୁଦ୍ରରୁ ମିଳିଲା ୯ ମତ୍ସ୍ୟଜୀବୀଙ୍କ ମୃତଦେହ

ଭୋଗରାଇ (ବଡ଼ ଖବର ବ୍ୟୁରୋ): ଉତ୍ତାଳ ସମୁଦ୍ରରୁ ଉଦ୍ଧାର ହେଲା ‘ଜୟ ମା କାଳୀ’ ଟ୍ରଲର । ନଅ ଜଣ ମତ୍ସ୍ୟଜୀବୀଙ୍କ ମୃତଦେହ ଉଦ୍ଧାର । ଆହୁରି ଛଅ ଜଣ ନିଖୋଜା ୧୦ ଦିନର ରୁଦ୍ଧଶ୍ୱାସ ତଲାସି ପରେ ଶେଷରେ ବଙ୍ଗୋପସାଗରରେ ନିଖୋଜ ହୋଇଥିବା ଦୀଘା-ଶଙ୍କରପୁରର ‘ଜୟ ମା କାଳୀ’ ଟ୍ରଲରର ସନ୍ଧାନ ମିଳିଛି। ଦକ୍ଷିଣ ୨୪ ପ୍ରଗଣାର ବକଖାଲି ଉପକୂଳରୁ ପ୍ରାୟ ୩୫ କିଲୋମିଟର ଦୂରରେ ଚୁଲକାଠି ଜଙ୍ଗଲ ନିକଟସ୍ଥ ବାଘେରଚର ଅଞ୍ଚଳରେ ରବିବାର ଟ୍ରଲରଟି ଓଲଟି ପଡ଼ିଥିବା ଅବସ୍ଥାରେ ଚିହ୍ନଟ କରାଯାଇଥିଲା। ପରେ ବନ ବିଭାଗ, ଗୋବର୍ଦ୍ଧନପୁର କୋଷ୍ଟାଲ ଥାନା, ସୁନ୍ଦରବନ ପୋଲିସ, ଉପକୂଳ ରକ୍ଷୀ ବାହିନୀ ଓ ସ୍ଥାନୀୟ ମତ୍ସ୍ୟଜୀବୀ ସଂଗଠନର ମିଳିତ ଅଭିଯାନରେ ଟ୍ରଲରଟିକୁ ଉଦ୍ଧାର କରି ସନ୍ଧ୍ୟାରେ ପାଥରପ୍ରତିମାର ଗୋବର୍ଦ୍ଧନପୁର ସୀତାରାମପୁର ଘାଟକୁ ଆଣାଯାଇଥିଲା।

ଗତ ଜୁଲାଇ ୨ରେ ଦୀଘାର ଶଙ୍କରପୁର ମତ୍ସ୍ୟ ବନ୍ଦରରୁ ମାଛ ଧରିବା ଉଦ୍ଦେଶ୍ୟରେ ‘ଜୟ ମା କାଳୀ’ ଟ୍ରଲରଟି ସମୁଦ୍ରକୁ ଯାଇଥିଲା। ଜୁଲାଇ ୫ ପରେ ଟ୍ରଲର ସହିତ ସମସ୍ତ ସମ୍ପର୍କ ବିଚ୍ଛିନ୍ନ ହୋଇଯାଇଥିଲା। ଏହା ପରେ ପୋଲିସ, କୋଷ୍ଟଗାର୍ଡ, ନୌସେନା, ବନ ବିଭାଗ ଓ ମତ୍ସ୍ୟଜୀବୀ ସଂଗଠନମାନଙ୍କ ମିଳିତ ଉଦ୍ୟମରେ ବ୍ୟାପକ ତଲାସି ଅଭିଯାନ ଆରମ୍ଭ ହୋଇଥିଲା। ଶନିବାରଠାରୁ ସୁନ୍ଦରବନ ଟାଇଗର ରିଜର୍ଭର ଡେପୁଟି ଫିଲ୍ଡ ଡିରେକ୍ଟର ଚିତ୍ରକ ଭଟ୍ଟାଚାର୍ୟ୍ୟଙ୍କ ନେତୃତ୍ୱରେ ଉଦ୍ଧାର ଅଭିଯାନକୁ ଆହୁରି ଜୋରଦାର କରାଯାଇଥିଲା। ଏହି ଅଭିଯାନରେ ରାମଗଙ୍ଗା ରେଞ୍ଜର ରେଞ୍ଜର କବୀର ହୋସେନଙ୍କ ସମେତ ବନ ବିଭାଗର ଅଧିକାରୀ, ବନକର୍ମୀ ଓ ସୁନ୍ଦରବନ ପୋଲିସ ଜିଲ୍ଲାର ପୋଲିସ କର୍ମଚାରୀମାନେ ସାମିଲ ହୋଇଥିଲେ। ରବିବାର ସନ୍ଧ୍ୟାରେ ଟ୍ରଲରଟିକୁ ଅନ୍ୟ କିଛି ଟ୍ରଲରର ସହଯୋଗରେ ସୀତାରାମପୁର ଘାଟକୁ ଆଣିବା ପରେ ତଲାସି ସମୟରେ ଟ୍ରଲରର ଇଞ୍ଜିନ ସହିତ ଫସି ରହିଥିବା ଜଣେ ମତ୍ସ୍ୟଜୀବୀଙ୍କ ମୃତଦେହ ଉଦ୍ଧାର କରାଯାଇଥିଲା।

ଟ୍ରଲରରେ ମୋଟ ୧୫ ଜଣ ମତ୍ସ୍ୟଜୀବୀ ଥିଲେ। ସେମାନଙ୍କ ମଧ୍ୟରୁ ୯ ଜଣଙ୍କ ମୃତଦେହ ମିଳିଥିବା ବେଳେ ଆହୁରି ୬ ଜଣ ଏପର୍ୟ୍ୟନ୍ତ ନିଖୋଜ ଅଛନ୍ତି। ନିଖୋଜମାନଙ୍କ ମଧ୍ୟରୁ ତିନି ଜଣ ଓଡ଼ିଶାର ବାସିନ୍ଦା ବୋଲି ପ୍ରଶାସନିକ ସୂତ୍ରରୁ ଜଣାପଡ଼ିଛି । ପ୍ରଶାସନର ଆଶଙ୍କା ଯେ, ନିଖୋଜମାନଙ୍କ ମଧ୍ୟରୁ ଆହୁରି କେତେକ ଜଣ ଟ୍ରଲର ଭିତରେ ଅଟକି ରହିଥାଇପାରନ୍ତି। ଟ୍ରଲର ଭିତରେ ଜମିଥିବା ପାଣିକୁ ପମ୍ପ ସହାୟତାରେ ବାହାର କରି ତଲାସି ଜାରି ରହିଛି। ପାଣି ସମ୍ପୂର୍ଣ୍ଣ ଖାଲି ହେଲେ ନିଖୋଜ ମତ୍ସ୍ୟଜୀବୀମାନଙ୍କ ସମ୍ପର୍କରେ ଗୁରୁତ୍ୱପୂର୍ଣ୍ଣ ସୂଚନା ମିଳିପାରେ ବୋଲି ଅଧିକାରୀମାନେ ଆଶା ପ୍ରକାଶ କରିଛନ୍ତି। ଏପଟେ ଘଟଣାର ଖବର ପାଇ ଟ୍ରଲରର ମାଲିକ ଶଙ୍କରପୁରରୁ ଫ୍ରେଜରଗଞ୍ଜ ପହଞ୍ଚିଛନ୍ତି। ଉଦ୍ଧାର ଅଭିଯାନ ଏବେ ମଧ୍ୟ ଜାରି ରହିଛି।