ନବରଙ୍ଗପୁର ସୀମାରୁ ଗିରଫ ହେଲା ଆହତ ମାଓବାଦୀ
ରାଇଘର(ବଡ଼ ଖବର ବ୍ୟୁରୋ): ଆହତ ମହିଳା ମାଓବାଦୀ ମେଙ୍ଗା ନୁରେଟି ଓରଫ ସିନ୍ଧୁକୁ ଧରିବା ପରେ ଛତିଶଗଡ଼ ପୋଲିସ ଜିମାରେ ଦେଲା ନବରଙ୍ଗପୁର ପୋଲିସ । ଏନେଇ ନବରଙ୍ଗପୁର ପୋଲିସ ପକ୍ଷରୁ ପ୍ରେସ୍ ବିଜ୍ଞପ୍ତି ଜାରି କରି ସୂଚନା ଦିଆଯାଇଛି। ଛତିଶଗଡ଼ ଧମତେରୀ ଜିଲ୍ଲା ଖଲାରୀ ଥାନା ଏକୱାରୀ ଗ୍ରାମରେ ଜଣେ ମହିଳା ମାଓବାଦୀ ଲୁଚି ରହିଥିବା ନେଇ ଗୁଇନ୍ଦା ସୂତ୍ରରୁ ସୂଚନା ମିଳିଥିଲା। ତେଣୁ ନବରଙ୍ଗପୁର ଜିଲ୍ଲା ପୋଲିସ ପକ୍ଷରୁ ମାଓ ଦମନ ଅଭିଯାନ ଆରମ୍ଭ ହୋଇଥିଲା । ଡିଆଇଓସି ଅଧିକାରୀ, ଡିଭିଏଫ୍, ଏସଓଜି, ସିଆରପିଏଫ୍ ଏବଂ ନବରଙ୍ଗପୁର ଜିଲ୍ଲା ପୋଲିସ ପକ୍ଷରୁ ମିଳିତ ଭାବେ ଅପରେସନ ହୋଇଥିଲା । କୁନ୍ଦେଇରେ ଅବସ୍ଥାପତି ସିଆରପିଏଫ୍ ଯବାନ ମଧ୍ୟ ଜରୁରୀ ସମୟରେ ଅପରେସନରେ ସାମିଲ ହେବା ନିମନ୍ତେ ପ୍ରସ୍ତୁତ ହୋଇ ରହିଥିଲେ।
ସର୍ଚ୍ଚ ଅପରେସନ୍ ସମୟରେ ଏକୱାରୀ ଗ୍ରାମର ଗୋଟିଏ ଘରେ ଆହତ ସିନ୍ଧୁକୁ ଠାବ କରାଯାଇଥିଲା । ପୋଲିସ କାବୁ କରିବା ପରେ ପଚରାଉଚରା କରିଥିଲା । ଗତ ୧୨ତାରିଖରେ ଛତିଶଗଡ଼ର କିରିପାନି ଏବଂ ଏକୱାରୀ ଗାଁ ନିକଟରେ ପୋଲିସ ସହ ମାଓବାଦୀଙ୍କ ଗୁଳି ବିନିମୟ ହୋଇଥିଲା। ଏଥିରେ ସିନ୍ଧୁ ସାମିଲ ଥିବା ବେଳେ ଆହତ ହୋଇଥିଲା। ଏହାପରେ ଗୋଟିଏ ଘରେ ଆତ୍ମଗୋପନ କରି ରହିଥିଲା। ସୀତାନଦୀ ଏରିଆ କମିଟିରେ ୨୦୨୧ ମସିହାରେ ସିନ୍ଧୁ ସାମିଲ ହୋଇଥିଲା। ଦୀପକ ମାନ୍ଦଭି ଓରଫ ଅରୁଣ ଅଧୀନରେ ସିନ୍ଧୁ କାମ କରୁଥିଲା। ଅଧିକ ତଦନ୍ତ ପାଇଁ ସିନ୍ଧୁକୁ ଛତିଶଗଡ଼ର ଧମତେରୀ ଜିଲ୍ଲା ପୋଲିସ କୁ ହସ୍ତାନ୍ତର କରିଛି ନବରଙ୍ଗପୁର ପୋଲିସ ।