ପୁରୀ(ବଡ଼ ଖବର ବ୍ୟୁରୋ): ଆଉ ଦୁଇଦିନ ପରେ ପବିତ୍ର ଦେବସ୍ନାନ ପୂର୍ଣ୍ଣିମା। ଏଥିପାଇଁ ନୀତି ନିର୍ଘଣ୍ଟ ଧାର୍ଯ୍ୟ ହେବାପରେ ପ୍ରସ୍ତୁତିପର୍ବ ଜୋରସୋରରେ ଆଗେଇ ଚାଲିଛି। ବୁଧବାରଠାରୁ ଦେବସ୍ନାନ ପୂର୍ଣ୍ଣିମା ନୀତିକାନ୍ତି ଆରମ୍ଭ ହେଉଛି । ଶ୍ରୀଜିଉଙ୍କ ସେବା କରିବା ପାଇଁ ଦଇତାପତି ସେବକମାନେ ଅଣ୍ଟାଭିଡିଛନ୍ତି । ରଥଯାତ୍ରାରେ ଦେବସ୍ନାନ ପୂର୍ଣ୍ଣିମାଠାରୁ ଆରମ୍ଭ କରି ନୀଳାଦ୍ରି ବିଜେ ପର୍ଯ୍ୟନ୍ତ ନୀତିକାନ୍ତି ପାଇଁ ମଙ୍ଗଳବାର ଶ୍ରୀମନ୍ଦିରରେ ଦଇତାପତି ପ୍ରବେଶ ନୀତି ଅନୁଷ୍ଠିତ ହୋଇଛି । ବରିଷ୍ଠ ଦଇତାପତି ସେବକ ବିଶ୍ବାବସୁ ବିନାୟକ ଦାସମହାପାତ୍ର କହିଛନ୍ତି ବର୍ଷକୁ ଗୋଟିଏ ମାସ ରଥଯାତ୍ରାରେ ଦଇତାପତି ସେବକମାନେ ମହାପ୍ରଭୁଙ୍କ ପୂର୍ଣ୍ଣ ସେବା କରିବାର ସୌଭାଗ୍ୟ ପାଇଥାନ୍ତି। ମଙ୍ଗଳବାର ଠାରୁ ଏହି ସେବା ଆରମ୍ଭ ହେ।ଇଛି। ପରମ୍ପରା ଅନୁଯାୟୀ, ମଙ୍ଗଳାଆଳତି ପରେ ପରେ ଦଇତାପତି ପ୍ରବେଶ ନୀତି ଅନୁଷ୍ଠିତ ହୋଇଥାଏ । ରଥଯାତ୍ରା ଦଇତାପତି ସେବକଙ୍କ ଗୋଷ୍ଠୀଗତ ସେବା। ଦେବସ୍ନାନ ପୂର୍ଣ୍ଣିମାରୁ ଏହି ସେବା ଆରମ୍ଭ ହୋଇଥାଏ।
ଶ୍ରୀଜିଉଙ୍କ ମଙ୍ଗଳାଆଳତି ପରେ ଦଇତାପତି ସେବକମାନେ ଶ୍ରୀମନ୍ଦିରରେ ପ୍ରବେଶ କରିଛନ୍ତି। ସଂଧ୍ୟା ଆଳତି ପରେ ପରେ କୋଠ ସୁଆଁସିଆଁମାନେ ସେନାପଟା ଲାଗି ପାଇଁ ରତ୍ନ ସିଂହାସନରେ ଚାରମାଳ ବାନ୍ଧିବେ। ପରେ ବଉଳକଣ୍ଟ ନୀତି ଅନୁଷ୍ଠିତ ହେବ। ପରଦିନ ସେନାପଟା ଲାଗି ନୀତି ଅନୁଷ୍ଠିତ ହେବ ବୋଲି ଶ୍ରୀ ଦାସମହାପାତ୍ର କହିଛନ୍ତି। ସେପଟେ ଦେବସ୍ନାନ ପୂର୍ଣ୍ଣିମାରେ ମହାପ୍ରଭୁଙ୍କ ସେନାପଟା ଲାଗି ଓ ବାହୁଟ କଣ୍ଟ ପାଇଁ ଆବଶ୍ୟକ ବଉଳ କାଠ ସୁସଜ୍ଜିତ ଶଗଡ଼ରେ ସାକ୍ଷୀଗୋପାଳସ୍ଥିତ ମହାପ୍ରଭୁଙ୍କ ଅଜାଙ୍କ ବଗିଚାରୁ ବାହାରି ଶ୍ରୀକ୍ଷେତ୍ରରେ ପହଞ୍ଚିଛି। ସୋମବାର ରାତିରେ ସୁସଜ୍ଜିତ ଶଗଡ଼ ରଥଖଳାରେ ପହଞ୍ଚିବା ପରେ ବଉଳକାଠକୁ ସାଇତି ରଖାଯାଇଛି।
