ଓଡିଶାର ଏହି ଦୁଇଟି ସ୍ଥାନରୁ ଟିକାକରଣର ଶୁଭାରମ୍ଭ କରିବେ ମୋଦି

ଭୁବନେଶ୍ୱର(ବଡ଼ ଖବର ବ୍ୟୁରୋ): କାଲିଠୁ ଭାଇରସ ବିରୁଦ୍ଧରେ ଦେଶର ବଡ଼ ଲଢେଇ । ମହାମାରୀକୁ ମାତଦେବ ଟିକା । ଆରମ୍ଭ ହେବାକୁ ଯାଉଛି ଦେଶବ୍ୟାପୀ ଟିକାକରଣ । ଦେଶର ତିନି ହଜାର ଛଅଟି କେନ୍ଦ୍ରରେ ପ୍ରଥମ ପର୍ୟ୍ୟାୟ ଟିକାକରଣ ଆରମ୍ଭ ହେବ । କାଲି ଦିନ ୧୦.୩୦ରେ ଏହାର ଶୁଭାରମ୍ଭ କରିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଓଡିଶାର ରାଜଧାନୀ ଭୁବନେଶ୍ୱର ସମେତ ସୁନ୍ଦରଗଡ଼ରୁ ଟିକାକରଣର ଶୁଭାରମ୍ଭ କରିବେ ମୋଦି । ଏହି ଟିକାକରଣ ପାଇଁ ଦେଶରେ ସମସ୍ତ ପ୍ରସ୍ତୁତି ସରିଛି । ଦେଶରେ ଟିକାକରଣ ପାଇଁ ୩ ହଜାର ୬ଟି କେନ୍ଦ୍ର ଚିହ୍ନଟ ହୋଇଥିବାବେଳେ ରାଜ୍ୟରେ ମୋଟ୍ ୧୬୧ଟି କେନ୍ଦ୍ରରେ ୧ ଲକ୍ଷ ୯୨ ହଜାର ୫୫୫ ଜଣଙ୍କୁ ଟିକାକରଣ ପାଇଁ ଚିହ୍ନଟ କରାଯାଇଛି । ପ୍ରଥମ ପର୍ୟ୍ୟାୟ ଟିକାକରଣରେ ହିଁ ନିର୍ଣ୍ଣାୟକ ବିଯୟ ବାର୍ତ୍ତା ଦେବ ମହାମାରୀ ବିରୁଦ୍ଧରେ । ଯାହା ଭାରତ ପାଇଁ ନିଶ୍ଚିତ ରୂପରେ ଏକ ଐତିହାସିକ ଦିନ । ପ୍ରତ୍ୟେକ କେନ୍ଦ୍ରରେ ୧୦୦ ଜଣ ହିତାଧିକାରୀଙ୍କୁ ପ୍ରଥମ ଦିନରେ ଟିକା ଦିଆଯିବ । କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟ ପ୍ରସ୍ତୁତ କୋ-ୱିନ ଆପ୍ ଡାଉନଲୋଡ୍ କରିଛନ୍ତି ହିତାଧିକାରୀ । ଆପ୍ଲିକେସନ୍ ଜରିଆରେ ଟିକାଦାନ କେନ୍ଦ୍ର ଓ ସମୟ ବାବଦରେ ସୂଚନା ଦିଆଯାଇଛି ।