ଓଡ଼ିଶା ଆସୁଛନ୍ତି ନବନିଯୁକ୍ତ କଂଗ୍ରେସ ପ୍ରଭାରୀ ଚେଲାକୁମାର
ଭୁବନେଶ୍ୱର (ବଡ଼ ଖବର ବ୍ୟୁରୋ): ୬ଦିନିଆ ଓଡ଼ିଶା ଗସ୍ତରେ ଆସୁଛନ୍ତି ନବନିଯୁକ୍ତ ଓଡ଼ିଶା ପ୍ରଭାରୀ ଡ. ଏ ଚେଲାକୁମାର । ଆଜି ପୂର୍ବାହ୍ନରେ ସେ ପହଞ୍ଚିବେ । ତାଙ୍କୁ ସ୍ୱାଗତ କରିବା ଲାଗି ଚଳଚଞ୍ଚଳ ହୋଇ ଉଠିଛି କଂଗ୍ରେସ ଭବନ । ବୁଧବାର ଅପରାହ୍ନରେ କଂଗ୍ରେସର ପୁରୁଖା ନେତା, ବିଧାୟକ ଏବଂ ଦଳୀୟ କର୍ମୀମାନେ ତାଙ୍କୁ ସମ୍ବର୍ଦ୍ଧିତ କରିବେ । ସେଦିନ ଅପରାହ୍ନରେ ସାମ୍ବାଦିକ ସମ୍ମିଳନୀ ଡକାଯାଇଛି । ସନ୍ଧ୍ୟାରେ ବିଧାୟକଦଳ ନେତା ନରସିଂହ ମିଶ୍ରଙ୍କ ଘରେ ବିଧାୟକ ଦଳର ବୈଠକରେ ଚେଲାକୁମାର ଯୋଗଦେବେ ।
ଚେଲାକୁମାର ଗୁରୁବାର ଦଳର ବରିଷ୍ଠ ନେତାଙ୍କୁ ସାକ୍ଷାତ କରିବା ପରେ ଜଗତସିଂହପୁର ଜିଲ୍ଲା ବିରିଡ଼ି ଗସ୍ତରେ ଯାଇ ତିର୍ତ୍ତାଲ ଉପନିର୍ବାଚନ ଲାଗି ଆୟୋଜିତ କର୍ମୀ ସମ୍ମିଳନୀରେ ଯୋଗଦେବେ । ଶୁକ୍ରବାର ରାଜ୍ୟ ଓ ଜିଲ୍ଲାର ଛାତ୍ରନେତା, ଯୁବନେତା ,ମହିଳା ମୋର୍ଚ୍ଚା, ଆଦିବାସୀ ବର୍ଗର ନେତାଙ୍କ ସହ ସେ ଆଲୋଚନା କରିବାର କାର୍ଯ୍ୟକ୍ରମ ରହିଛି । ୧୦ ତାରିଖରେ ବାଲେଶ୍ୱରରେ ଆୟୋଜିତ କୃଷି ସମାବେଶରେ ସେ ଯୋଗଦେବେ । ୧୧ ତାରିଖରେ ସେ ଦିଲ୍ଲୀ ଫେରିଯିବେ ।
ରାଜ୍ୟରେ ଦୁଇଟି ବିଧାନସଭା ଆସନରେ ହେବାକୁ ଥିବା ଉପନିର୍ବାଚନ ସମ୍ପର୍କରେ ଦଳୀୟ ନେତାଙ୍କ ସହ ପ୍ରଭାରୀ ଆଲୋଚନା କରିବେ । ଦଳୀୟ ନେତାଙ୍କୁ ଗୁରୁମନ୍ତ୍ରଣ ଦେବେ ଚେଲା କୁମାର । ରାଜ୍ୟ କଂଗ୍ରେସରେ ଦୀର୍ଘଦିନ ହେବ ଲାଗି ରହିଛି ଶୀତଳ ଯୁଦ୍ଧ । ପିସିସି ସଭାପତି ବଦଳ ଲାଗି ଦଳରେ ଲାଗିରହିଥିଲା କନ୍ଦଳ । ଏଣୁ ଭିନ୍ନ ଭିନ୍ନ ଗୋଷ୍ଠୀରେ ଥିବା ଦଳୀୟ ନେତାଙ୍କୁ ଏକଜୁଟ କରିବା ସହ ବିଜେପି ଏବଂ ବିଜେଡିକୁ କିପରି ଘେରିବେ ସେନେଇ ରଣନୀତି ପ୍ରସ୍ତୂତ କରାଯିବ ବୋଲି ଶୁଣିବାକୁ ମିଳୁଛି ।