କାଲିଠୁ ବିଧାନସଭାରେ ଅସଲ ଶୋ’
ଭୁବନେଶ୍ୱର(ବଡ଼ ଖବର ବ୍ୟୁରୋ): କାଲିଠୁ ସରଗରମ ହେବ ବିଧାନସଭା । ବାଚସ୍ପତି ନିର୍ବାଚନ ଓ ଅତିରିକ୍ତ ବଜେଟ ପରେ ଗୃହ ଶନିବାର ଓ ରବିବାର ମୁଲତବି ରହିଥିଲା । ଆସନ୍ତାକାଲି ମୌସୁମୀ ଅଧିବେଶନର ବାସ୍ତବ ଚର୍ଚ୍ଚା ହେବ । ବିଭିନ୍ନ ପ୍ରସଙ୍ଗ ଉଠିବ । ବିଶେଷକରି, ଏଥର ବିରୋଧୀଙ୍କ ହାତରେ ଅନେକ ପ୍ରସଙ୍ଗ ରହିଛି । ମୁଣ୍ଡ ଉପରେ ନିର୍ବାଚନ ଥିବାରୁ ଶାସକଙ୍କୁ ଘେରିବାକୁ ବିରୋଧୀଙ୍କ ପାଇଁ ଏଙି ଅଧିବେଶନ ବଡ ସୁଯୋଗ ।
ବିରୋଧୀ ଦଳ ନେତା ଜୟ ନାରାୟଣ ମିଶ୍ର ସରକାରଙ୍କୁ ଶାଣିତ ଆକ୍ରମଣ କରିବେ ବୋଲି ସୂଚନା ମଧ୍ୟ ଦେଇସାରିଲେଣି । କଂଗ୍ରେସ ମଧ୍ୟ ଏଦିଗରେ ପ୍ରସ୍ତୁତି ସାରିଛି । ସେପଟେ ବିଜେଡି ସବୁବେଳେ ନିଜର କାଉଣ୍ଟର ରଣନୀତିରେ ବିରୋଧୀଙ୍କ ଉଦ୍ୟମକୁ ପଣ୍ଡ କରିଆସିଛି । ତେଣୁ ଏଥର ଦଳ କିଭଳି ଯୋଜନା ଆପଣାଉଛି ତାହା ଉପରେ ସମସ୍ତଙ୍କ ନଜର ରହିଛି । ଅନ୍ୟପକ୍ଷରେ, ବିଜେଡିରୁ ବହିଷ୍କାର ହେବା ପରେ ଖଣ୍ଡପଡା ବିଧାୟକ ସୌମ୍ୟରଂଜନ ପଟ୍ଟନାୟକ କିଭଳି ଆଭିମୁଖ୍ୟ ରଖିବେ ତାହା ଉପରେ ମଧ୍ୟ ସମସ୍ତଙ୍କ ନଜର ରହିଛି ।