ଆବାସ ଯୋଜନାରୁ ବଞ୍ଚିତ ପାଲୁଣି ମାଝୀ

କଣିହାଁ, (ବଡ଼ ଖବର ବ୍ୟୁରୋ): ସରକାରଙ୍କ ଆବାସ ଯୋଜନା କାହାପାଇଁ। ସରକାର ଗରିବ ବାସହୀନଙ୍କ ପାଇଁ ଆବାସ ଯୋଜନା ଆରମ୍ଭ କରିଛନ୍ତି । କିନ୍ତୁ ପ୍ରକୃତରେ ଏହାର ସୁବିଧା ଯୋଗ୍ୟ ହିତାଧିକାରୀ ପାଇପାରୁ ନାହାନ୍ତି। ଅନୁଗୁଳ ଜିଲ୍ଲା କଣିହାଁ ବ୍ଲକ ଘଣ୍ଟିଆନାଳି ଗାଁରେ ଦେଖିବାକୁ ମିଳିଛି ଏଭଳି ଚିତ୍ର। ଘଣ୍ଟିଆନାଳି ଗାଁର ପାଲୁଣି ମାଝୀ ଏକ ଛୋଟ ତାଳବରଡ଼ା ଓ ମାଟି କାନ୍ଥ ଘରେ ଦୀର୍ଘଦିନ ହେବ ରହି ଆସୁଛନ୍ତି। ଆଜକୁ ଠିକ୍ ଦୁଇ ବର୍ଷ ପୂର୍ବେ ସ୍ୱାମୀ କାନ୍ଦୁରୁ ମାଝୀ ଆରପାରିକୁ ଚାଲିଗଲେ।

ବର୍ତ୍ତମାନ ସେ ତିନି ପୁଅ ଓ ଗୋଟିଏ ଝିଅଙ୍କୁ ଧରି ଅସହାୟ ଭାବେ ପଡ଼ିରହିଛନ୍ତି ଭଙ୍ଗାଘରେ। ନା ଅଛି ଜମିବାଡ଼ି ନା ଅଛି ସ୍ଥାୟୀ ଘର। ପାଲୁଣି ମୂଲ ଲାଗି ପିଲାମାନଙ୍କ ପାଇଁ ଦିଓଳି ଦିମୁଠା ଖାଇବା ଯୋଗାଡ଼ କରନ୍ତି। ଝିଅ ବଡ଼ ହୋଇଥିବାରୁ ତା ପାଇଁ ସେ ସର୍ବଦା ଚିନ୍ତିତ । ଅସରାଏ ବର୍ଷା ହେଲେ ଘର ଭିତରକୁ ପାଣି ପଶିଯାଏ । ଏଭଳି ଦୟନୀୟ ଅବସ୍ଥାରେ ଦିନ କାଟନ୍ତି ପାଲୁଣିଙ୍କ ପରିବାର। ଘର ଖଣ୍ଡିଏ ପାଇଁ ଦୌଡ଼ି ଦୌଡ଼ି ନୟାନ୍ତ ହେବାପରେ କୌଣସି ଫଳ ନ ମିଳିବାରୁ ଶେଷରେ ନିରାଶ ହୋଇ ବଡ଼ ଖବର ମାଧ୍ୟମରେ ସରକାରଙ୍କ ଦୃଷ୍ଟି ଆକର୍ଷଣ କରିଛନ୍ତି।