ଥାନା ଆଗରେ ଦୁର୍ବୃତ୍ତଙ୍କ ଆତଙ୍କ
ପୁରୀ (ବଡ଼ ଖବର ବ୍ୟୁରୋ): ଥାନା ନିକଟରେ ଦୁର୍ବୃତ୍ତଙ୍କ ଆତଙ୍କ। ଦୁର୍ବୃତ୍ତଙ୍କ ଆକ୍ରମଣରେ ଲହୁ ଲୁହାଣ ହେଲେ ଜଣେ ଦୋକାନୀ। ଆକ୍ରମଣ ସହିତ ଟଙ୍କା ମଧ୍ୟ ଛଡାଇ ନେଇଥିବା ନେଇ ଥାନାରେ ଅଭିଯୋଗ ହୋଇଛି । ଗତକାଲି ବିଳମ୍ବିତ ରାତିରେ ପୁରୀ ସଦର ଥାନା ନିକଟରେ ଘଟିଛି ଏଭଳି ଘଟଣା। ଆକ୍ରମଣର ଶିକାର ହୋଇଥିବା ଦୋକାନୀ ଜଣକ ହେଉଛନ୍ତି ବାଟ ଗାଁର ସୁନିଲ ନାୟକ। ଗତକାଲି ବିଳମ୍ବିତ ରାତିରେ ସୁନିଲ୍ ତାଙ୍କ ଦୋକାନରେ ଶୋଇଥିଲେ।
ଦୋକାନ ବନ୍ଦ ଥିବା ସମୟରେ ତିନି ଜଣ ଯୁବକ ତାଙ୍କ ଦୋକାନ ଭିତରେ ପଶି ତାଙ୍କୁ ମରଣାନ୍ତକ ଆକ୍ରମଣ କରିବା ସହ ତାଙ୍କଠାରୁ ୧୨ ହଜାର ୮ ଶହ ଟଙ୍କା ଛଡ଼ାଇ ନେଇଥିବା ଅଭିଯୋଗ ହୋଇଛି। ଏନେଇ ସଦର ଥାନାରେ ଅଭିଯୋଗ ହେବା ପରେ ପୋଲିସ ଘଟଣାର ତଦନ୍ତ ଆରମ୍ଭ କରିଛି। ଥାନା ନିକଟରେ ଦୁର୍ବୃତ୍ତଙ୍କ ଏଭଳି ଆତଙ୍କରାଜକୁ ନେଇ ପୋଲିସର କାର୍ଯ୍ୟଶୈଳୀ ଉପରେ ସାଧାରଣରେ ପ୍ରଶ୍ନ ଉଠିଛି। ଥାନା ନିକଟରେ ଯଦି ସାଧାରଣ ଲୋକ ସୁରକ୍ଷିତ ନୁହନ୍ତି ତେବେ ପୁରୀକୁ ଆସୁଥିବା ପର୍ଯ୍ୟଟକ ଓ ସ୍ଥାନୀୟ ଲୋକେ ନିଜକୁ କେତେ ସୁରକ୍ଷିତ ମନେ କରିବେ ସେନେଇ ମଧ୍ୟ ପ୍ରଶ୍ନ ଉଠିଛି।