ପୁରୀ(ବଡ଼ ଖବର ବ୍ୟୁରୋ): ବହୁ ପ୍ରତୀକ୍ଷାର ଅନ୍ତ ଘଟିଛି । ଦୀର୍ଘ ୯ ମାସ ପରେ ଶ୍ରୀଜୀଉଙ୍କୁ ଦର୍ଶନ କରୁଛନ୍ତି ଶ୍ରୀକ୍ଷେତ୍ରବାସୀ । ୩ଦିନ ଧରି ସେବାୟତ ମାନଙ୍କ ପାଇଁ ଚାଲିଥିବା ଦର୍ଶନ ଆସନ୍ତାକାଲି ଶେଷ ହେବା ପରେ ଆଜିଠାରୁ ଲଗାତର ୩ ଦିନ ଧରି ମହାପ୍ରଭୁଙ୍କୁ ଦର୍ଶନ କରିପାରିବେ ପୁରୀ ସହରବାସୀ । ଆଜି ମହାପ୍ରଭୁଙ୍କ ଦର୍ଶନ ପାଇଁ ୭ଟି ୱାର୍ଡ଼ର ସ୍ଥାନୀୟ ବାସୀନ୍ଦାଙ୍କୁ ଅନୁମତି ମିଳିଛି । କୋଭିଡ ଗାଇଡଲାଇନ ମାନି ଜଗା ଦର୍ଶନ କରୁଛନ୍ତି ପୁରୀ ସହରବାସୀ । ସକାଳ ୮ଟା ରୁ ୧୨ଟା ଯାଏଁ ୬ ଏବଂ ୯ ନମ୍ବର ୱାର୍ଡ଼ବାସୀ କରିପାରିବେ ଦର୍ଶନ ।
ସେହିନରି ୧୨ଟାରୁ ୪ଟା ମଧ୍ୟରେ ୧୨ ଏବଂ ୧୫ ନମ୍ବର ୱାର୍ଡ଼ବାସୀ କରିବେ ଦର୍ଶନ । ଏବଂ ୪ଟା ୩୦ରୁ ରାତି ୯ଟା ମଧ୍ୟରେ ୧୧, ୨ ଏବଂ ୩ ନମ୍ବର ୱାର୍ଡ଼ବାସୀ ଜଗା ଦର୍ଶନ କରିବାର ସୂଯୋଗ ପାଇବେ । ସମସ୍ତ ଭକ୍ତ ଶ୍ରୀମନ୍ଦିର ପ୍ରବେଶ ପୂର୍ବରୁ ନିଜର ପରିଚୟ ପତ୍ର ଦେଖାଇବେ ଏବଂ ସମସ୍ତଙ୍କ ପାଇଁ ମାସ୍କ ଏବଂ ସାନିଟାଇଜର ବାଧ୍ୟତାମୂଳକ କରାଯାଇଛି । ସୁରକ୍ଷା ବ୍ୟବସ୍ଥା ପାଇଁ ପ୍ରଶାସନ ପକ୍ଷରୁ ୧୮ ପ୍ଲାଟୁନ ପୋଲିସ ଫୋର୍ସ ମୂତୟନ କରାଯାଇଛି ।
