ନିର୍ବାଚନ ପୂର୍ବରୁ ଇଲେକ୍ଟୋରାଲ ବଣ୍ଡ ଉପରେ ରୋକ ଲଗାଇଲେ ସୁପ୍ରିମକୋର୍ଟ

ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ନିର୍ବାଚନ ବଣ୍ଡ ମାମଲା ଉପରେ ସୁପ୍ରିମକୋର୍ଟଙ୍କ ବଡ଼ ରାୟ । ନିର୍ବାଚନ ବଣ୍ଡ ଯୋଜନାକୁ ଅସାମ୍ବିଧାନିକ ବୋଲି ଘୋଷଣା କଲେ ସୁପ୍ରିମକୋର୍ଟ ।  ତୁରନ୍ତ କାର୍ଯ୍ୟକାରୀ କରିବାକୁ ବାରଣ କରିଛନ୍ତି। ଏହି ଯୋଜନା ଆରଟିଆଇର ଉଲ୍ଲଂଘନ ବୋଲି କୋର୍ଟ କହିଛନ୍ତି। କେବଳ ଏତିକି ନୁହେଁ, ମାର୍ଚ୍ଚ ୬ ସୁଦ୍ଧା ନିର୍ବାଚନ ବଣ୍ଡ ବିଷୟରେ ସୂଚନା ଦେବାକୁ ସୁପ୍ରିମକୋର୍ଟ ଏସବିଆଇକୁ କହିଛନ୍ତି। ନିର୍ବାଚନ ବଣ୍ଡର ବୈଧତା ଉପରେ ପ୍ରଶ୍ନ ଉଠାଇ ସୁପ୍ରିମକୋର୍ଟରେ ମୋଟ ଚାରିଟି ଆବେଦନ କରାଯାଇଥିଲା।

ଗତ ବର୍ଷ ଅକ୍ଟୋବରରେ କୋର୍ଟ ଏହା ଶୁଣାଣି କରିଥିଲେ ଏବଂ ନଭେମ୍ବରରେ ଏହି ନିଷ୍ପତ୍ତି ସଂରକ୍ଷିତ ରଖିଥିଲେ। ଆଜି ନିର୍ବାଚନ ବଣ୍ଡ ଯୋଜନାକୁ ଚ୍ୟାଲେଞ୍ଜ କରୁଥିବା ଆବେଦନ ଉପରେ ଏହି ରାୟ ପ୍ରଦାନ କରୁଥିବାବେଳେ ମୁଖ୍ୟ ବିଚାରପତି ଜଷ୍ଟିସ ଡି.ୱାଇ ଚନ୍ଦ୍ରଚୂଡ଼ଙ୍କୁ ନେଇ ଗଠିତ ପାଞ୍ଚ ଜଣିଆ ଖଣ୍ଡପୀଠ କହିଛନ୍ତି ଯେ, ନିର୍ବାଚନୀ ବଣ୍ଡ ସ୍କିମ୍ ଲୋକଙ୍କର ସୂଚନା ଅଧିକାରକୁ କ୍ଷୂର୍ଣ୍ଣ କରୁଛି। ବେଞ୍ଚର ନିଷ୍ପତ୍ତି ସର୍ବସମ୍ମତ ଅଟେ। ଯଦିଓ, ଏହି କ୍ଷେତ୍ରରେ ଦୁଇଟି ନିଷ୍ପତ୍ତି ଅଛି, କିନ୍ତୁ ସିଦ୍ଧାନ୍ତ ଗୋଟିଏ ।  ସେ କହିଛନ୍ତି କଳା ଟଙ୍କା ରୋକିବା ଉଦ୍ଦେଶ୍ୟରେ ସୂଚନା ଅଧିକାରର ଉଲ୍ଲଂଘନ ଯଥାର୍ଥ ନୁହେଁ। ସରକାରଙ୍କ ଟଙ୍କା କେଉଁଠୁ ଆସୁଛି ଏବଂ କେଉଁଠିକୁ ଯାଉଛି ନାଗରିକମାନେ ଜାଣିବାର ଅଧିକାର ରହିଛି।  ବଣ୍ଡ ନେଇଥିବା ବ୍ୟକ୍ତି ବିଶେଷଙ୍କ ନାମ ସାର୍ବଜନୀନ କରାଯିବ । ୱେବସାଇଟରେ ସମସ୍ତ ତଥ୍ୟ ଦେବାକୁ ଇସିଆଇକୁ ନିର୍ଦ୍ଦେଶ । କେନ୍ଦ୍ର ସରକାର ୨୦୧୮ରେ ନିର୍ବାଚନ ବଣ୍ଡ ଯୋଜନା ଆରମ୍ଭ କରିଥିଲେ। ରାଜନୈତିକ ଦଳଗୁଡିକ ଗ୍ରହଣ କରିଥିବା ଅର୍ଥରେ ସ୍ୱଚ୍ଛତା ଆଣିବା ପାଇଁ ପ୍ରୟାସର ଏକ ଅଂଶ ଭାବରେ ଏହା ଆରମ୍ଭ କରାଯାଇଥିଲା |