ବର୍ଷା ପବନରେ ଉଡିଲା ଘର
ରାଇଘର (ବଡ଼ ଖବର ବ୍ୟୁରୋ): ନବରଙ୍ଗପୁର ଜିଲ୍ଲା ରାଇଘର ବ୍ଲକ କୁମୁଲିରେ କାଳବଶାଖୀର ପ୍ରଭାବ ଯୋଗୁଁ ପ୍ରବଳ ଝଡ଼ ତୋଫାନ ଏବଂ କୁଆପଥର ବର୍ଷା ହୋଇ ବହୁ ଲୋକଙ୍କ ଘର ଛପର ଉଡ଼ିଯାଇଛି । ଖାଲି ସେତିକି ନୁହେଁ ଗଛ ଭାଙ୍ଗି ଘର ନଷ୍ଟ ହେବା ସହିତ ଏକର ଏକର ମକା ଓ ପରିବା ଫସଲ ନଷ୍ଟ ହୋଇଥିବା ଜଣା ପଡ଼ିଛି । କାଳବୈଶାଖୀର ପ୍ରଭାବରେ ହଠାତ ଝଡ଼ ତୋଫାନ ସହ କୁଆପଥର ବର୍ଷା ହୋଇଥିଲା । ମାତ୍ର ୧୫ ରୁ ୨୦ମିନିଟ ମଧ୍ୟରେ ଏହି ଝଡ଼ ତୋଫାନ ସବୁ କିଛି ଛାରଖାର କରି ଦେଇଥିଲା ।
ଝଡ ତୋଫାନରେ ଘରଦ୍ୱାର ନଷ୍ଟ ହେବା ସହିତ ମକା ଏବଂ ପରିବା ଫସଲ ମଧ୍ୟ ସମ୍ପୂର୍ଣ୍ଣ ନଷ୍ଟ ହୋଇଥିବା ଦେଖିବାକୁ ମିଳିଛି । ଉକ୍ତ ଗ୍ରାମର ମନୋତାଶ ଥଲବରୀଙ୍କ ତିନି ଏକର ମକା ଫସଲ ଝଡ଼ ତୋଫାନରେ ସମ୍ପୂର୍ଣ୍ଣ ନଷ୍ଟ ହୋଇଥିବା ଜଣା ପଡ଼ିଛି । ଝଡ଼ ହେବା ଫଳରେ ମକା ଗଛ ସବୁ ଭାଙ୍ଗି ଯାଇ ମାଟିରେ ମିଶି ଯାଇଛି । ସେହିଭଳି ଉକ୍ତ ଗ୍ରାମର ରାଜକୁମାର ଦାସଙ୍କ ଦୁଇ ଏକର ଫୁଲକୋବି ଚାଷ ଏବଂ ଅଧ ଏକର ଲଙ୍କା ଚାଷ ଏହି ଝଡ଼ ତୋଫାନରେ ସମ୍ପୂର୍ଣ୍ଣ ନଷ୍ଟ ହୋଇଥିବା ସୂଚନା ମିଳିଛି ।
ଏହି ପରିପେକ୍ଷିରେ ପ୍ରଶାସନ ପକ୍ଷରୁ କ୍ଷତିଗ୍ରସ୍ତ ପରିବାରଙ୍କୁ ସହାୟତା କରିବାକୁ ଗ୍ରାମବାସୀଙ୍କ ପକ୍ଷରୁ ଦାବି ହୋଇଛି । ଏହି କାଳବୈଶାଖୀ ଯୋଗୁଁ ରାଇଘର ବ୍ଲକର ବିଦ୍ୟୁତ ଯୋଗାଣ ଉପରେ ଘୋର ପ୍ରଭାବ ଦେଖିବାକୁ ମିଳିଛି । ଅଳ୍ପ ସମୟର ଝଡ଼ ତୋଫାନ ରେ ବ୍ୟାପକ କ୍ଷତି ଘଟାଇଛି । ଉମରକୋଟ ଠାରୁ ରାଇଘରକୁ ଆସିଥିବା ୩୩ କେଭିର ୪ ଗୋଟି ବିଦ୍ୟୁତ ପୋଲ ବଙ୍କା ହୋଇଯାଇଛି । ଯାହା ଫଳରେ ବିଦ୍ୟୁତ ଯୋଗାଯୋଗ ବର୍ତ୍ତମାନ ସମ୍ପୂର୍ଣ୍ଣ ଠପ ହୋଇ ପଡ଼ିଛି ।