ଛତିଶଗଡ଼ରୁ ଛାତିଥରା ଖବର, ସହିଦ ଯବାନଙ୍କ ସଂଖ୍ୟା ୨୨କୁ ବୃଦ୍ଧି
ଛତିଶଗଡ଼ (ବଡ଼ ଖବର ବ୍ୟୁରୋ): ଛତିଶଗଡ଼ରୁ ଆସିଲା ଛାତିଥରା ଖବର। ଛତିଶଗଡ଼ ବିଜାପୁରରେ ନକ୍ସଲ ଆକ୍ରମଣରେ ଏପର୍ଯ୍ୟନ୍ତ ୨୨ ଜଣ ଯବାନଙ୍କ ମୃତଦେହ ଉଦ୍ଧାର କରାଯାଇଛି। ଏଥି ସହିତ ୧୧ ଜଣ ଯବାନ ଏବେବି ନିଖୋଜ ଅଛନ୍ତି। ପୂର୍ବରୁ ଏହି ଆକ୍ରମଣରେ ପାଞ୍ଚଜଣ ଯବାନ ସହିଦ ହୋଇଥିବା ଖବର ଆସିଥିଲା, କିନ୍ତୁ ବର୍ତ୍ତମାନ ଏହି ସଂଖ୍ୟା ୨୨ ରେ ପହଞ୍ଚିଛି। ଏହି ଆକ୍ରମଣରେ ନିହତଙ୍କ ସଂଖ୍ୟା ଆହୁରି ଅଧିକ ହୋଇପାରେ ବୋଲି ଅନୁମାନ କରାଯାଉଛି।
ଏହି ଆକ୍ରମଣରେ ସମୁଦାୟ ୩୨ ଯବାନ ଆହତ ହୋଇଛନ୍ତି, ଯେଉଁଥିରେ ୨୫ ଯବାନ ବିଜାପୁର ହସ୍ପିଟାଲରେ ଚିକିତ୍ସିତ ହେଉଛନ୍ତି । ଏଥି ସହ ଛତିଶଗଡ଼ ପୋଲିସ ମଧ୍ୟ ୯ ଜଣ ନକ୍ସଲଙ୍କୁ ହତ୍ୟା କରିଥିବା ଦାବି କରିଛି। ଏଥିସହ ପୋଲିସ ଅଧିକାରୀଙ୍କ କହିବା ଅନୁଯାୟୀ ସୁରକ୍ଷା ବାହିନୀ ମଧ୍ୟ ମହିଳା ନକ୍ସଲଙ୍କ ମୃତଦେହକୁ ଘଟଣାସ୍ଥଳରୁ ଉଦ୍ଧାର କରିଛନ୍ତି।
ଅନ୍ୟପକ୍ଷରେ, ନିଖୋଜ ଯବାନଙ୍କ ସନ୍ଧାନରେ ୬୦୦ ସୁରକ୍ଷାକର୍ମୀଙ୍କୁ ନିୟୋଜିତ କରାଯାଇଛି । ଏହି ଅଞ୍ଚଳ ନକ୍ସଲାଇଟ୍ ହିଡମାର ଗଡ଼ ଅଟେ । ତେଣୁ, ଏନକାଉଣ୍ଟରର ସମ୍ଭାବନା ମଧ୍ୟ ପୁଣି ଉଠୁଛି । କେନ୍ଦ୍ର ସରକାର ଏହି ପ୍ରସଙ୍ଗରେ ନଜର ରଖିଛନ୍ତି।
