ବିଜାପୁର (ବଡ଼ ଖବର ବ୍ୟୁରୋ): ଛତିଶଗଡ ବିଜାପୁରରେ ନକ୍ସଲ ମାନଙ୍କର ବର୍ବରକାଣ୍ଡ । ଏ ଘଟଣାର ଜବାବ ଦେବା ପାଇଁ ଗୃହମନ୍ତ୍ରୀ ଅମିତ ଶାହ ଏକ ଉଚ୍ଚସ୍ତରୀୟ ବୈଠକ କରିଛନ୍ତି । ବୈଠକରେ ନକ୍ସଲଙ୍କୁ ଦମନ କରିବା ପାଇଁ ଏକ ବଡ ଯୋଜନା କରାଯାଉଥିବା ସୂଚନା ମିଳିଛି । ବୈଠକରେ ଅମିତ ଶାହା କହିଛନ୍ତି ନକ୍ସଲ ବିରୋଧୀ ଅପରେସନରେ କୌଣସି ପ୍ରକାରର ଅବହେଳା ନହେବା ଦରକାର । ଏହି ନକ୍ସଲ ଆକ୍ରମଣ ଘଟଣାର ତଦନ୍ତ ଏନଆଇଏକୁ ଦିଆଯିବାର ସମ୍ଭାବନା ଅଛି । ଗୃହ ମନ୍ତ୍ରାଳୟର ବରିଷ୍ଠ ଅଧିକାରୀ ଏବଂ ସିଆରପିଏଫର ବରିଷ୍ଠ ଅଧିକାରୀଙ୍କ ସହିତ ଗୃହମନ୍ତ୍ରୀ ଏହି ଆଲୋଚନା କରିଛନ୍ତି ।
ଛତିଶଗଡ଼ ବିଜାପୁର ନକ୍ସଲ ଆକ୍ରମଣରେ ୨୩ ଜଣ ଯବାନଙ୍କ ମୃତ୍ୟୁ ହୋଇଛି । ପୂର୍ବରୁ ଏହି ଆକ୍ରମଣରେ ପାଞ୍ଚଜଣ ଯବାନ ସହିଦ ହୋଇଥିବା ଖବର ଆସିଥିଲା, କିନ୍ତୁ ପରେ ଏହି ସଂଖ୍ୟା ୨୩ ରେ ପହଞ୍ଚିଥିଲା ।ଏହି ଆକ୍ରମଣରେ ସମୁଦାୟ ୩୨ ଯବାନ ଆହତ ହୋଇଛନ୍ତି, ଯେଉଁଥିରେ ୨୫ ଯବାନ ବିଜାପୁର ହସ୍ପିଟାଲରେ ଚିକିତ୍ସିତ ହେଉଛନ୍ତି । ଏଥି ସହ ଛତିଶଗଡ଼ ପୋଲିସ ମଧ୍ୟ ୯ ଜଣ ନକ୍ସଲଙ୍କୁ ହତ୍ୟା କରିଥିବା ଦାବି କରିଛି।
ଏଥିସହ ପୋଲିସ ଅଧିକାରୀଙ୍କ କହିବା ଅନୁଯାୟୀ ସୁରକ୍ଷା ବାହିନୀ ମଧ୍ୟ ମହିଳା ନକ୍ସଲଙ୍କ ମୃତଦେହକୁ ଘଟଣାସ୍ଥଳରୁ ଉଦ୍ଧାର କରିଛନ୍ତି। ଅନ୍ୟପକ୍ଷରେ, ନିଖୋଜ ଯବାନଙ୍କ ସନ୍ଧାନରେ ୬୦୦ ସୁରକ୍ଷାକର୍ମୀଙ୍କୁ ନିୟୋଜିତ କରାଯାଇଛି । ଏହି ଅଞ୍ଚଳ ନକ୍ସଲାଇଟ୍ ହିଡମାର ଗଡ଼ ଅଟେ ।
