ଜଗତସିଂହପୁର(ବଡ଼ ଖବର ବ୍ୟୁରୋ): ନିଆରା ଢଙ୍ଗରେ ଜନ୍ମଦିନ ପାଳନ । କୌଣସି ସାମାଜିକ ଉତ୍ସବରେ ଯେଉଁମାନଙ୍କୁ କେହି ନିମନ୍ତ୍ରଣ କରନ୍ତି ନାହିଁ କି ସମ୍ମାନ ଦିଅନ୍ତି ନାହିଁ । ସେଇମାନଙ୍କୁ ଡାକି ନିଜ ଝିଅର ପ୍ରଥମ ଜନ୍ମଦିନ ପାଳନ କରି ଚର୍ଚ୍ଚାକୁ ଆସିଛନ୍ତି ଜଗତସିଂହପୁର ଜିଲା ନାଉଗାଁ ବ୍ଲକ ନଳାଙ୍ଗ ଗାଁର ସମାସଜସେବୀ ମନୋଜ ସ୍ୱାଇଁ ।
ଝିଅର ପ୍ରଥମ ଜନ୍ମ ବାର୍ଷିକକୁ ବେଶ ନିଆରା ଢଙ୍ଗରେ ପାଳନ କରିଛନ୍ତି ନଳାଙ୍ଗ ଗାଁର ମନୋଜ ସ୍ୱାଇଁ । ଜନ୍ମ ଉତ୍ସବରେ ଲୋକେ ବନ୍ଧୁ ବାନ୍ଧବ ତଥା ନେତା ବା ପ୍ରତିଷ୍ଠିତ ବ୍ୟକ୍ତିମାନଙ୍କୁ ନିମନ୍ତ୍ରଣ କରିଥାନ୍ତି । ସେମାନଙ୍କ ଆତିଥ୍ୟତାରେ ଯେପରି କିଛି ତ୍ରୁଟି ନହୁଏ ସେଥିପାଇଁ ମଧ୍ୟ ଯତ୍ନଶୀଳ ହୋଇଥାନ୍ତି । ହେଲେ ସେଇ ପରମ୍ପରାକୁ ପଛରେ ପକାଇ ସମାଜର କିଛି ଅବହେଳିତ ବର୍ଗର ଲୋକଙ୍କୁ ଅତିଥି ଭାବରେ ଡାକି ନିଜ ଝିଅର ଜନ୍ମଦିନ ପାଳନ କରିଛନ୍ତି ମନୋଜ ।
ଆଦିବାସୀ ବସ୍ତିର କିଛି ବୃଦ୍ଧ,ବୃଦ୍ଧା, ମହିଳା ଓ ଶିଶୁମାନଙ୍କୁ ଜନ୍ମଦିନ ଭୋଜିକୁ ନିମନ୍ତ୍ରଣ କରିଥିଲେ ମନୋଜ । ସେମାନଙ୍କୁ ସ୍ୱତନ୍ତ୍ର ଗାଡ଼ିରେ ଆଣି ଷ୍ଟେଜରେ ସେମାନଙ୍କୁ ଫୁଲତୋଡା ଓ ଉତ୍ତରୀୟ ପ୍ରଦାନ କରିଥିଲେ ମନୋଜ ଓ ତାଙ୍କ ପରିବାର ଲୋକେ । ପରେ ସେମାନଙ୍କୁ ସୁସ୍ୱାଦୁ ଖାଦ୍ୟ ପରସି ଆପାୟିତ କରିଥିଲେ । ଏହି କାର୍ଯ୍ୟକ୍ରମକୁ ଡକାଯାଇ ଯେପରି ସମ୍ମାନିତ କରାଗଲା ତାକୁ ନେଇ ବେଶ ଆନନ୍ଦିତ ଆଦିବାସୀ ମହିଳା ଓ ପୁରୁଷମାନେ ।
