ଗଞ୍ଜାମ (ବଡ଼ ଖବର ବ୍ୟୁରୋ): କଂଗ୍ରେସର ଟାର୍ଗେଟରେ ରାଜ୍ୟ ସରକାର । ଦିଗପହଣ୍ଡି ନିର୍ବାଚନମଣ୍ଡଳୀ କୁକୁଡ଼ାଖଣ୍ଡିଠାରେ ରାଜ୍ୟ ସରକାରଙ୍କୁ ସମାଲୋଚନା କଲେ ପୂର୍ବତନ ମୁଖ୍ୟ ଶାସନ ସଚିବ ତଥା କଂଗ୍ରେସ ନେତା ବିଜୟ ପଟ୍ଟନାୟକ । ମୁଖ୍ୟମନ୍ତ୍ରୀଙ୍କ ନିଜ ଗଞ୍ଜାମରେ ସରକାରୀ କର୍ମଚାରୀ ଓ ପ୍ରଶାସନିକ ଅଧିକାରୀମାନେ ବିଜେଡି କର୍ମୀ ଭାବେ କାର୍ୟ୍ୟ କରୁଛନ୍ତି। ସେମାନଙ୍କୁ ଚାପ ପ୍ରୟୋଗ କରି ଦଳୀୟ କାର୍ଯ୍ୟରେ ନିୟୋଜିତ କରୁଛନ୍ତି । ଏଥିରୁ କ୍ଷାନ୍ତ ରୁହନ୍ତୁ । ଗଞ୍ଜାମ ଜିଲ୍ଲାକୁ ସରକାର ଏକ ନମ୍ୱର କରିବାକୁ ସ୍ବପ୍ନ ଦେଖିଛନ୍ତି । କିନ୍ତୁ ଏଠି କଳକାରଖାନା ନାହିଁ ।
ଦାଦନ ଶ୍ରମିକ ଭାବେ ବାହାର ରାଜ୍ୟକୁ ଅନେକ ଯାଆନ୍ତି। ଆସିକାରେ ଥିବା ସ୍ଵିନିଙ୍ଗ ମିଲ ବନ୍ଦ ରହିଛି। ଚିନିଶିଳ୍ପ ଦୁର୍ଦ୍ଦିନରେ । ସରକାର କିଭଳି ଏକ ନମ୍ୱର୍ କରିବା ସ୍ବପ୍ନ ଦେଖିଛନ୍ତି। ରାଜ୍ୟରେ ବର୍ତ୍ତମାନ ଜାଲ ସାର୍ଟିଫିକେଟର ଚେର ଅନେକ ଦୂରକୁ ଲମ୍ବିଛି । ଯଦି ସାଧାରଣ ଲୋକ ଜାଣିଥିଲେ, ତାହା ହେଲେ ପ୍ରଶାସନ ମଧ୍ୟ ଜାଣିଛି । ଯଦି ପ୍ରଶାସନ ଅବଗତ, ତାହା ହେଲେ ସରକାରୀ ଦଳ ମଧ୍ୟ ଏଥିରେ ସାମିଲ। ଅବସର ଗ୍ରହଣ କରିଥିବା କର୍ମଚାରୀଙ୍କୁ ପୁଣିଥରେ ନିଯୁକ୍ତ ଦେବା ଠିକ୍ ନୁହେଁ, ଯେଉଁମାନେ ମେଧବୀ ସେମାନଙ୍କ ଉପରେ ଚାପ ପଡ଼ିବ ।
୫ଟିକୁ ନେଇ ପୁଣି ପ୍ରଶ୍ନ କରିଛନ୍ତି ବିଜୟ । ଯେଉଁଠି ସରକାରଙ୍କ ପ୍ରଶାସନିକ ମୁଖ୍ୟ ହେଉଛନ୍ତି ମୁଖ୍ୟ ଶାସନ ସଚିବ, ସେଠି ୫ଟି କ’ଣ ବୋଲି ସେ କହିଛନ୍ତି। କଂଗ୍ରେସ ଦଳ କଥାରେ ନୁହେଁ, କାମରେ ବିଶ୍ୱାସ କରେ । ତେଣୁ କଂଗେସ ଦଳ ଆଗକୁ ଅଗ୍ରଗତି କରିବ । ସବୁଠି କଂଗ୍ରେସର ପକେଟ ଭୋଟ ଅଛି । ତେଣୁ ବହୁ ବରିଷ୍ଠ ଦଳରେ ସାମିଲ ହେବେ ।
