କଟକ: ବଡ଼ ମେଡିକାଲରେ ଅଘଟଣ, ଚିକିତ୍ସାଧୀନ ରୋଗୀ ଉପରେ ଛିଡ଼ି ପଡ଼ିଲା ଫ୍ୟାନ୍

କଟକ (ବଡ଼ ଖବର ବ୍ୟୁରୋ): କଟକ ବଡ଼ ମେଡିକାଲରେ ଅଘଟଣ । ଚିକିତ୍ସିତ ଅବସ୍ଥାରେ ରୋଗୀ ଉପରେ ଛିଡ଼ି ପଡ଼ିଲା ଫ୍ୟାନ୍ । ଗୁରୁତର ଅବସ୍ଥାରେ ରୋଗୀକୁ ଆଇସିୟୁ କୁ ସ୍ଥାନାନ୍ତର। କଟକ ଏସସିବି ମେଡିକାଲର ସର୍ଜରୀ ବିଭାଗରେ ଘଟିଛି ଏହି ଅଘଟଣ।

ଯାଜପୁର ଅଞ୍ଚଳର ଜଣେ ମହିଳା ନିଆଁ ରେ ପୋଡ଼ି ହୋଇ ସର୍ଜରୀ ବିଭାଗରେ ଗତ କିଛିଦିନ ହେଲା ରହି ଚିକିତ୍ସିତ ହେଉଥିଲେ। ତେବେ ଆଜି ବେଡ ମିଳି ନଥିବାରୁ ତଳେ ମହିଳା ଜଣକ ଶୋଇଥିବା ବେଳେ ଠିକ୍ ଉପରେ ଥିବା ଏକ ସିଲିଂ ଫ୍ୟାନ ଚାଲୁଥିବା ଅବସ୍ଥାରେ ହଠାତ୍ ଛିଣ୍ଡିପଡିଥିଲା।

ମହିଳାଙ୍କ ମୁଣ୍ଡ, ଛାତି ଓ ଗୋଡରେ ଗଭୀର ଆଘାତ ଲାଗିଥିବା ଯୋଗୁଁ ଗୁରୁତର ହେବାରୁ ତାଙ୍କୁ ଆଇସିୟୁ କୁ ସ୍ଥାନାନ୍ତରିତ କରାଯାଇଛି। ତାଙ୍କ ଅବସ୍ଥା ଗୁରୁତର ରହିଛି। ଏହି ଘଟଣା ପାଇଁ ମହିଳାଙ୍କ ସମ୍ପର୍କୀୟ ମେଡିକାଲ କତ୍ତୃପକ୍ଷଙ୍କୁ ଦାୟୀ କରିଛନ୍ତି। ତେବେ କଟକ ବଡ଼ ମେଡ଼ିକାଲରେ ବାରମ୍ବାର ଏହି ଘଟଣା ଘଟୁଥିଲେ ମଧ୍ୟ ମେଡିକାଲ କତ୍ତୃପକ୍ଷଙ୍କ ଚେତା ପଶୁନି।