ନଦୀରେ ସିଲିଣ୍ଡର ବନ୍ୟା

ଭୁବନେଶ୍ୱର(ବଡ଼ ଖବର ବ୍ୟୁରୋ): ପାଣିରେ ଭାସିଲା ୩୦୦୦ ହଜାର ଗ୍ୟାସ ସିଲିଣ୍ଡର । କଥାଟା ଶୁଣିବାକୁ ଟିକେ ଆଶ୍ଚର୍ଯ୍ୟ ଲାଗୁଥିବ । ହେଲେ ସତ । ଆଖିରେ ନଦେଖିଲେ ବିଶ୍ୱାସ ହେବନି । ହଠାତ୍ ବନ୍ୟା ମାଡି ଆସିବାରୁ ଗ୍ୟାସ୍ ଗୋଦାମ ଭିତରେ ପଶିଥିଲା ବନ୍ୟାଜଳ । ଯାହା ଫଳରେ ଗୋଦାମ ଭିତରେ ଥିବା ପାଖାପାଖି ୩୦୦୦ ଗ୍ୟାସ ସିଲିଣ୍ଡର ଭାସିଯାଇଥିଲା । ଯାହାର ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ମହାରାଷ୍ଟ୍ରର ରାୟଗଡ ଜିଲ୍ଲା ଖାଲାପୁର ଅଞ୍ଚଳ ।

ହଠାତ ନଦୀରେ ଆସିଥିଲା ବନ୍ୟା । ହିନ୍ଦୁସ୍ଥାନ ପେଟ୍ରୋଲିୟମ କର୍ପୋରେସନ ଲିମିଟେଡର ଏକ ବଟଲିଂ ପ୍ଲାଣ୍ଟରୁ ପ୍ରାୟ ୩୦୦୦ ଗ୍ୟାସ ସିଲିଣ୍ଡର ପାତାଲଗଙ୍ଗା ନଦୀରେ ଭାସି ଯାଇଥିଲା । କିଛି ସିଲିଣ୍ଡରରେ ଗ୍ୟାସ୍ ଭର୍ତ୍ତି ଥିବା ବେଳେ ବାକି ସିଲିଣ୍ଡର ଖାଲି ଥିବା ଜଣାପଡ଼ିଛି । ଆଉ ସବୁଠୁ ବଡ଼ କଥା ହେଉଛି ସ୍ଥାନୀୟ ଲୋକେ ନଦୀରେ ସିଲିଣ୍ଡର ଭାସୁଥିବା ଥିବା ଦେଖି ଆଖି ପିଛୁଳାକେ ରଶି ଲଗାଇ କୂଳକୁ ଆଣିଥିଲେ । ସେପଟେ ରାୟଗଡ ଜିଲ୍ଲା ମାଜିଷ୍ଟ୍ରେଟ୍ ନାଗରିକ ମାନଙ୍କୁ ଗ୍ୟାସ୍ ସିଲିଣ୍ଡର ଗୁଡିକ ନିଜ ପାଖରେ ନରଖି ତହସିଲ କାର୍ଯ୍ୟାଳୟ କିମ୍ବା ଏକ ଅଧିକାର ପ୍ରାପ୍ତ ଏଚପିସିଏଲ ଡିଲରଙ୍କ ପାଖେ ଜମା କରନ୍ତୁ ନିବେଦନ କରିଛନ୍ତି ।