ଆଇସିଏସଇ ଦଶମ ପରୀକ୍ଷା ବାତିଲ

ଭୁବନେଶ୍ବର (ବଡ଼ ଖବର ବ୍ୟୁରୋ): କରୋନାର ପ୍ରକୋପ ଦିନକୁ ଦିନ ବଢିବାରେ ଲାଗିଛି । ଏହାକୁ ଦୃଷ୍ଟିରେ ରଖି ସରକାର ଦଶମ ଶ୍ରେଣୀ ବୋର୍ଡ ପରୀକ୍ଷାକୁ ବାତିଲ କରିଛନ୍ତି । ଛାତ୍ରଛାତ୍ରୀଙ୍କୁ ଏକାଦଶ ଶ୍ରେଣୀରେ ନାମ ଲେଖାଇବାକୁ ସବୁ ସ୍କୁଲଗୁଡିକୁ ନିର୍ଦ୍ଦେଶ ଦେଇଛନ୍ତି । ଅନ୍ୟପଟେ ଦ୍ୱାଦଶ ଶ୍ରେଣୀର ପିଲାମାନଙ୍କ ପାଇଁ ଅନଲାଇନ କ୍ଲାସ କରାଇବାକୁ ଶିକ୍ଷାନୁଷ୍ଠାନଗୁଡିକୁ ପରାମର୍ଶ ଦେଇଛନ୍ତି ।

ଏହାପୂର୍ବରୁ ସିବିଏସଇ ପରୀକ୍ଷାକୁ ବି ବାତିଲ କରାଯାଇଥିଲା । ମଙ୍ଗଳବାର ସକାଳୁ ଭୁବନେଶ୍ୱରର ୧୫ ଟି ସ୍କୁଲର ଦଶମଶ୍ରେଣୀ ଛାତ୍ରଛାତ୍ରୀ ପରୀକ୍ଷା ହେବ କି ନାହିଁ ଦ୍ୱନ୍ଦ ଦୂର କରିବାକୁ ନବୀନ ନିବାସ ଆଗରେ ପହଞ୍ଚିଥିଲେ । ସେମାନେ କହିଥିଲେ କି ପରୀକ୍ଷା ନେଇ ଶିକ୍ଷାମନ୍ତ୍ରୀ ଦ୍ୱନ୍ଦ ଦୂର କରୁନଥିବାରୁ ସେମାନେ ମୁଖ୍ୟମନ୍ତ୍ରୀଙ୍କ ଠାରୁ ସ୍ପଷ୍ଟିକରଣ ଚାହୁଁଛନ୍ତି । ଏହାପରେ ରାଜ୍ୟ ସରକାର ଦଶମ ପରୀକ୍ଷା ସମ୍ପୂର୍ଣ୍ଣ ବାତିଲ ହେବା ନେଇ ସ୍ପଷ୍ଟ କରିଛନ୍ତି ।