କମ୍ପିବ କଳିଙ୍ଗ ଷ୍ଟାଡିୟମ୍, ଆଜି ବିଶ୍ୱ ଦୌଡକୁଦ ଲଢ଼େଇ
ଭୁବନେଶ୍ୱର (ବଡ଼ ଖବର ବ୍ୟୁରୋ): ଭାରତରେ ପ୍ରଥମଥର ହେବାକୁ ଯାଉଛି ୱାର୍ଲ୍ଡ ଆଥଲେଟିକ୍ସ କଣ୍ଟିନେଣ୍ଟାଲ୍ ଟୁର ସିଲଭର ମିଟ୍ । କଳିଙ୍ଗ ଷ୍ଟାଡିୟମ୍ ରେ ଆୟୋଜିତ ହେବ ଦୌଡକୁଦ ଲଢ଼େଇ । ଆଉ କିଛି ଘଣ୍ଟାର ଅପେକ୍ଷା । ବିଶ୍ୱ ଦୌଡକୁଦ ଲଢ଼େଇର ଶୁଭାରମ୍ଭ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଯୋଗ ଦେବେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ଆଜି ଅପରାହ୍ଣ ୪ଟାରେ ମହିଳା ଡିସ୍କସ ଥ୍ରୋରୁ ପ୍ରତିଯୋଗିତା ଆରମ୍ଭ ହେବ । ଷ୍ଟାଡିୟମ୍ ରେ ଏହି ପ୍ରତିଯୋଗିତା ଦେଖିବା ପାଇଁ ଦର୍ଶକଙ୍କ ପ୍ରବେଶକୁ ମାଗଣା କରାଯାଇଛି ।
ଓଡ଼ିଶା ସରକାରଙ୍କ କ୍ରୀଡ଼ା ଓ ଯୁବସେବା ବିଭାଗ, ଆଥ୍ଲେଟିକ୍ସ ଫେଡେରେସନ୍ ଅଫ୍ ଇଣ୍ଡିଆ (ଏଏଫ୍ଆଇ) ଏବଂ ବିଶ୍ୱ ଆଥ୍ଲେଟିକ୍ସର ମିଳିତ ସହଯୋଗରେ ଏହି ଏକ ଦିବସୀୟ ଦୌଡକୁଦ ପ୍ରତିଯୋଗିତାର ପ୍ରସ୍ତୁତି ଶେଷ ହୋଇଛି । କେବଳ ପ୍ରତିଯୋଗିତାକୁ ଅପେକ୍ଷା ରହିଛି । ଭାରତ ସହିତ ୧୨ ଏସିୟ ଦେଶ, ମୋଟ ୨୩ ଦେଶରୁ ୧୮୭ ଖେଳାଳି ଏହି ମହାଦେଶୀୟ ଲଢେଇରେ ଅବତୀର୍ଣ୍ଣ ହୋବାକୁ ଯାଉଛନ୍ତି ।
ପୁରୁଷ ଓ ମହିଳା ବର୍ଗରେ ସମାନ ୯ ଲେଖାଏଁ ମୋଟ ୧୮ ଇଭେଣ୍ଟ୍ ରେ ଏହାର ପ୍ରତିଦ୍ୱନ୍ଦିତା ହେବ । ଭାରତରୁ ୮୮ ଜଣ ଅଂଶଗ୍ରହଣ କରୁଥିବା ବେଳେ ଓଡ଼ିଶାରୁ ଅଛନ୍ତି ୬ଜଣ । ଏସୀୟ କ୍ରୀଡା ପୂର୍ବରୁ ପ୍ରସ୍ତୁତି ପଥରେ ଥିବା ଅନିମେଷ କୁଜୁରଙ୍କ ବ୍ୟତୀତ ବାପି ହାଁସଦା (ପୁରୁଷ ୮୦୦ ମିଟର), ସ୍ୱାଧୀନ କୁମାର ମାଝୀ(ପୁରୁଷ ୮୦୦ ମିଟର), କିଶୋର କୁମାର ଜେନା ( ପୁରୁଷ ଜାଭଲିନ), ଶ୍ରାବଣୀ ନନ୍ଦ (ମହିଳା ୧୦୦ ମିଟର) ଓ ପ୍ରଜ୍ଞାପ୍ରଶାନ୍ତି ସାହୁ (ମହିଳା ୧୦୦ ମିଟର ହର୍ଡଲ୍ସ)ଙ୍କ ଉପରେ ରହିବ ଦର୍ଶକଙ୍କ ନଜର ।