‘‘ଲୋକଙ୍କ ହତ୍ୟା ହେଉଛି, କିନ୍ତୁ କାର୍ଯ୍ୟାନୁଷ୍ଠାନ ପାଇଁ ସୁପ୍ରିମକୋର୍ଟଙ୍କୁ ଅନୁରୋଧ କରାଯାଉଛି’’

ନୂଆଦିଲ୍ଲୀ(ବଡ଼ ଖବର ବ୍ୟୁରୋ): ଉତ୍ତରପ୍ରଦେଶର ଲକ୍ଷ୍ମୀପୁର ଖେରୀରେ ଘଟିଥିବା ହିଂସାକାଣ୍ଡକୁ ନେଇ ସୁପ୍ରିମକୋର୍ଟଙ୍କୁ ସମାଲୋଚନା କରିଛନ୍ତି କଂଗ୍ରେସର ବରିଷ୍ଠ ନେତା କପିଲ ସିବଲ । ଲକ୍ଷ୍ମୀପୁରରେ ଗାଡ଼ି ଚଢ଼ି ୮ଜରଙ୍କ ମୃତ୍ୟୁ ହୋଇଛି । କିନ୍ତୁ ଏହି ମାମଲାରେ ସୁପ୍ରିମକୋର୍ଟ ନିଜ ଆଡ଼ୁ କୌଣସି ମାମଲା ରୁଜୁ କରିନଥିବା କାରଣରୁ ସୁପ୍ରିମକୋର୍ଟଙ୍କୁ ସମାଲୋଚନା କରିଛନ୍ତି କପିଲ ସିବଲ ।

ଏନେଇ ଟ୍ୱିଟ କରି କପିଲ କହିଚନ୍ତି ଏପରି ଏକ ସମୟ ଥିଲା ଯେତେବେଳେ ୟୁଟ୍ୟୁବ୍ ବା କୌଣସି ସୋସିଆଲ ମିଡିଆ ନଥିଲା । ସେତେବେଳେ ପ୍ରିଣ୍ଟ ମିଡିଆର ଖବର ଆଧାରରେ ସୁପ୍ରିମକୋର୍ଟ ନିଜ ଆଡ଼ୁ ମାମଲା ରୁଜୁ କରି କାର୍ଯ୍ୟ କରୁଥିଲେ । କିନ୍ତୁ ଏବେ ଯେବେ ଆମ ନାଗରିକ ମାନଙ୍କୁ ହତ୍ୟା କରାଯାଉଛି ସୁପ୍ରିମକୋର୍ଟଙ୍କୁ କାର୍ଯ୍ୟାନୁଷ୍ଠାନ ନେବାକୁ ଅନୁରୋଧ କରାଯାଉଛି । ଜଣେ ନାଗରିକ ଭାବରେ ମୁଁ ଭାବୁଛି ବିଚାରପତିଙ୍କ ଦ୍ୱାରା ନ୍ୟାୟିକ ତଦନ୍ତ ହେବା ଆବଶ୍ୟକ ।

ଅନ୍ୟପକ୍ଷେ ଘଟଣାର ଅଭିଯୁକ୍ତ କୁହାଯାଉଥିବା କେନ୍ଦ୍ରମନ୍ତ୍ରୀ ଅଜୟ ମିଶ୍ରା ଓ ତାଙ୍କ ପୁଅ ଆଶିଷ ମିଶ୍ରାଙ୍କୁ କଂଗ୍ରେସ ପକ୍ଷରୁ ତୀବ୍ର ବିରୋଧ କରାଯାଉଥିବା ଦେଖିବାକୁ ମିଳିଛି । ଖେରୀରେ ଘଟିଥିବା ଘଟଣାକୁ ନେଇ ଶାସକ ଦଳ ଦଳକୁ ଘେରିଛି, ଘଟଣାକୁ ଅହଙ୍କାରର ପ୍ରତୀକ ମଧ୍ୟ କହିଛି ଦଳ ।