ଯାଜପୁର(ବଡ଼ ଖବର ବ୍ୟୁରୋ): ମା’ କୋଟ୍ରାକ୍ଷୀଙ୍କ ଆଶୀର୍ବାଦ ପାଇବ ପୁଣି ଯାଜପୁରର ଦର୍ପଣଗଡ଼ । ପ୍ରତିଷ୍ଠା ହେବ ମନ୍ଦିର । ୨୦୨୧ରେ ମୂର୍ତ୍ତି ଚୋରି ହୋଇଥିଲା । ଏବେ ପୁଣି ଗାଁକୁ ଫେରିଛି । ୨ ବର୍ଷ ପରେ ମାଆ ପୁଣି ନିଜ ସ୍ୱ ସ୍ଥାନକୁ ଫେରିଛନ୍ତି । ଦର୍ପଣଗଡ଼ ଗ୍ରାମରୁ ଚୋରି ହୋଇଥିଲା ଏବଂ ତା’ ପରଦିନ ସକାଳେ ବଡଚଣା ଥାନାରେ ଏଥିନେଇ ଏକ ମାମଲା ମଧ୍ୟ ରୁଜୁ ହୋଇଥିଲା । ମୂର୍ତ୍ତି ଉଦ୍ଧାର ପାଇଁ ଅନେକ ଦାବି ଓ ଆନ୍ଦୋଳନ ସତ୍ତ୍ବେ ପୋଲିସ ବିଫଳ ହେବାରୁ ଘଟଣାର ୭ ମାସ ପରେ ଗାଁ ଲୋକେ ମାଆଙ୍କର ଆଉ ଏକ ମୂର୍ତ୍ତି ମନ୍ଦିରରେ ସ୍ଥାପନ କରିଥିଲେ ।
ହଂକଂକୁ ଚୋରାଚାଲାଣ ବେଳେ ଦିଲ୍ଲୀ ବିମାନବନ୍ଦରରେ ଧରାପଡ଼ିଥିଲା ମୂର୍ତ୍ତିଟି । ଚୋରି ମୂର୍ତିକୁ କଷ୍ଟମ ବିଭାଗ ଠାବ କରିବା ପରେ ଓଡ଼ିଶା ଫେରାଇଦେବାକୁ ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କୁ ଚିଠି ଲେଖିଥିଲ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ଏହାପରେ ମୂର୍ତ୍ତି ଓଡ଼ିଶାକୁ ଫେରିଛି । ଏହି ମୂର୍ତ୍ତି ନବମ ଓ ଦଶମ ଶତାବ୍ଦୀର। ମା’ କୋଟ୍ରାକ୍ଷୀ ସ୍ଥାନୀୟ ଲୋକଙ୍କ ଆସ୍ଥା, ଐତିହ୍ୟ ଏବଂ ବିଶ୍ବାସର କେନ୍ଦ୍ର । ଏବେ ନିଜ ଇଷ୍ଟ ଦେବୀଙ୍କମୂର୍ତ୍ତି ଫେରିପାଇବା ପରେ ଖୁସିରେ ବିଭୋର ଗ୍ରାମବାସୀ ।
