ଉଦ୍ଧାର କାର୍ଯ୍ୟରେ ନିୟୋଜିତ ହେଲା ମଡ୍ରାସ୍ ସାପର୍ସ
ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ଉତ୍ତରାଖଣ୍ଡର ଉତ୍ତରକାଶୀରେ ଟନେଲରେ ୪୧ ଶ୍ରମିକ ୧୭ ଦିନ ହେଲା ଫସି ରହିଛନ୍ତି। ହେଲେ ସେମାନଙ୍କୁ ବାହାର କରିବା ସମ୍ଭବ ହୋଇପାରି ନାହିଁ। ଏହି ପରିପ୍ରେକ୍ଷୀରେ ରବିବାରଠାରୁ ପାହାଡ଼ ଉପରୁ ଖନନ କାର୍ଯ୍ୟ ଆରମ୍ଭ ହୋଇଛି। ପାହାଡ଼ ଉପରୁ ଖନନ କରାଗଲେ ୪ ଦିନରେ ଶ୍ରମିକମାନଙ୍କ ପାଖରେ ପହଞ୍ଚି ହେବ ବୋଲି ବିଶେଷଜ୍ଞମାନେ ଆକଳନ କରିଛନ୍ତି। ସେପଟେ ଶ୍ରମିକଙ୍କୁ ସୁରକ୍ଷିତ ଭାବେ ଉଦ୍ଧାର କରିବାକୁ ମଡ୍ରାସ୍ ସାପର୍ସଙ୍କୁ ବ୍ୟବହାର କରାଯାଇଛି । ଭାରତୀୟ ସେନାର ଅଭିଜ୍ଞ ତଥା ଶୀର୍ଷ ଶ୍ରେଣୀର ଇଞ୍ଜିନିୟରମାନଙ୍କର ଏକ ଗୋଷ୍ଠୀକୁ ମଡ୍ରାସ୍ ସାପର୍ସ କୁହାଯାଏ । ଯେଉଁମାନେ କି ଏହିଭଳି କଷ୍ଟକର ମିସନରେ ସାମିଲ ହୁଅନ୍ତି ।
ମଡ୍ରାସ୍ ସାପର୍ସର ବ୍ରିଟିଶ ଯୁଗରେ ଏହା ନିୟୋଜିତ ହୋଇଥିଲା । ସେହି ସମୟରେ ଏହି ଗୋଷ୍ଠୀକୁ ମଡ୍ରାସ ସାପର୍ସ କୁହାଯାଉଥିଲା । ସେମାନଙ୍କୁ ଏପରି ଭାବରେ ତାଲିମ ଦିଆଯାଇଥିଲା ଯେ ଏହି ଗୋଷ୍ଠୀରେ ଅନ୍ତର୍ଭୁକ୍ତ ସୈନିକମାନେ ବିନା ଅସ୍ତ୍ରରେ ସବୁଠୁ ବଡ ଆହ୍ୱାନକୁ ଦୂର କରିପାରିବେ । ୧୯୪୭ ରେ ଦେଶ ସ୍ୱାଧୀନ ହେବା ପରେ ତୁରନ୍ତ ଜମ୍ମୁ କଶ୍ମୀର ଅଞ୍ଚଳରେ ମଡ୍ରାସ ସାପର୍ସ ନିୟୋଜିତ ହୋଇଥିଲେ । ସେ ଜାମ୍ମୁରେ ଅନେକ ପ୍ରମୁଖ ଉଦ୍ଧାର କାର୍ଯ୍ୟ କରିଥିଲେ ।
ଅନ୍ୟପଟେ ଉଦ୍ଧାର କାର୍ୟ୍ୟରେ ଅନ୍ୟ ଏକ ବଡ଼ ପ୍ରତିବନ୍ଧକ ସାମ୍ନା କରିବାକୁ ପଡିପାରେ ବୋଲି ବିଶେଷଜ୍ଞମାନେ ଆକଳନ କରିଛନ୍ତି । ପାଣିପାଗ ବିଭାଗ ପକ୍ଷରୁ ଉତ୍ତରାଖଣ୍ଡ ପାଇଁ ୟେଲୋ ୱାର୍ନିଂ ଜାରି କରାଯାଇଛି। ସୋମବାରଠାରୁ ୩ ଦିନ ପର୍ଯ୍ୟନ୍ତ ପ୍ରବଳ ବର୍ଷା ଏବଂ ତୁଷାରପାତ ହେବ ବୋଲି ପାଣିପାଗ ବିଭାଗ ପକ୍ଷରୁ ଚେତାବନୀ ଦିଆଯାଇଛି। ଏନେଇ ଉଦ୍ଧାର କାର୍ଯ୍ୟ ବାଧାପ୍ରାପ୍ତ ହୋଇପାରେ ଅନୁମାନ କରାଯାଉଛି।