ମଣିପୁର ଉଲଗ୍ନ ଘଟଣା, ଅଭିଯୁକ୍ତଙ୍କ ଘରେ ଲଗାଇଲେ ନିଆଁ
ଇମ୍ଫାଲ (ବଡ଼ ଖବର ବ୍ୟୁରୋ): ମଣିପୁରରେ ଦୁଇ ମହିଳାଙ୍କୁ ଉଲଗ୍ନ କରି ବୁଲାଇବା ଘଟଣା ସାରା ଦେଶକୁ କରିଦେଇଛି ସ୍ତବ୍ଧ । କିଛି ଦିନର ବିରାମ ପରେ ପୁଣି କୁହୁଳିଛି ହିଂସା । ମଣିପୁରର ଥୋବାଲ ଜିଲାର ୟେରିପୋକ ଗ୍ରାମରେ ଲୋକମାନେ ମୁଖ୍ୟ ଅଭିଯୁକ୍ତଙ୍କ ଘରେ ନିଆଁ ଲଗାଇ ଦେଇଛନ୍ତି । ପୋଲିସ ମୁଖ୍ୟ ଅଭିଯୁକ୍ତଙ୍କୁ ଗିରଫ କରିବା ପରେ ଲୋକମାନେ ୟେରିପୋକ ଗ୍ରାମରେ ଏକାଠି ହୋଇଥିଲେ।
ଏହା ପରେ ଅଶାନ୍ତ ଜନତା ମୁଖ୍ୟ ଅଭିଯୁକ୍ତ ହୁରେମ ହେରୋଡାସ ମେଟେଇଙ୍କ ଘରେ ନିଆଁ ଲଗାଇ ଦେଇଥିଲେ। ବିଳମ୍ବିତ ରାତିରେ ବରିଷ୍ଠ ପୋଲିସ ମୁଖ୍ୟ ଅଭିଯୁକ୍ତଙ୍କ ଘର ଜଳିଯାଇଥିବା ନିଶ୍ଚିତ କରିଛି। ତେବେ ପୋଲିସ ଏ ସମ୍ପର୍କରେ ତଦନ୍ତ ଜାରି ରଖିଛି । ସେପଟେ ସମସ୍ତ ଅଭିଯୁକ୍ତଙ୍କୁ ଧରିବା ପାଇଁ ମଣିପୁର ପୋଲିସ ଏକ ଟିମ ଗଠନ କରିଛି। ବୁଧବାର ରାତିରୁ ପୋଲିସ ଟିମ ବିଭିନ୍ନ ସ୍ଥାନରେ ଚଢାଉ କରୁଛି।