ଅବହେଳିତ କରୋନା ଆକ୍ରାନ୍ତ

ବାସୁଦେବପୁର(ବଡ଼ ଖବର ବ୍ୟୁରୋ): ଅବହେଳିତ କରୋନା ଆକ୍ରାନ୍ତ । ଭୋକ ଉପାସରେ ଗଛମୂଳେ ପଡିରହିଛନ୍ତି ବୃଦ୍ଧା ।  ବାସୁଦେବପୁର ପୌରପାଳିକା କାର୍ଯ୍ୟାୟଳୟର ଗଛମୂଳେ ପଡିରହିଥିବା ବୃଦ୍ଧା ଜଣକ କରୋନା ପଜିଟିଭ । ବୃଦ୍ଧାଙ୍କୁ ବୟସ ୬୨ବର୍ଷ । ସେ କରୋନା ପଜିଟିଭ ଚିହ୍ନଟ ପରେ ସଙ୍ଗରୋଧର ସୁବିଧା ନଥିବାରୁ ଗଛମୂଳେ ପଡିରହିଛନ୍ତି । ପୌର ପରିଷଦର କର୍ମଚାରୀମାନଙ୍କୁ ସରକାର କରୋନା ଯୋଦ୍ଧା ଭାବେ ଘୋଷଣା କରିଛନ୍ତି । ମାତ୍ର ଏହି ଯୋଦ୍ଧାମାନେ କିପରି ମହାମାରୀ ସମୟରେ କାମ କରୁଛନ୍ତି, ଏହି ବୃଦ୍ଧାଙ୍କ କ୍ଷେତ୍ରରୁ ଜଳଜଳ ଦିଶୁଛି ।

ଅଫିସରଙ୍କଠାରୁ ଆରମ୍ଭ କରି କର୍ମଚାରୀମାନେ ସମସ୍ତେ ଦେଖୁଥିଲେ ମଧ୍ୟ ସତେ ଯେମିତି ଆଖିବୁଜି ଦେଇଛନ୍ତି । କାନ୍ଦ କାନ୍ଦି ବୃଦ୍ଧା ଜଣକ କହିଛନ୍ତି, ନିଜର ଭଲ ଘର,ଶୌଚାଳୟ ଏବଂ ନଳକୂଅଟିଏ ନଥିବାରୁ ଗୋଷ୍ଠୀ ନଳକୂଅ ଉପରେ ନିର୍ଭର କରନ୍ତି। କରୋନା ଆକ୍ରାନ୍ତ ଚିହ୍ନଟ ପରେ ଗ୍ରାମବାସୀ ଚଳପ୍ରଚଳ କରିବାକୁ ବାରଣ କରିଥିଲେ । ବାଧ୍ୟ ହୋଇ ଗଛମୂଳକୁ ବାଛି ନେଇଛନ୍ତି । ଭୋକ ଉପବାସରେ ପଡିରହିଛନ୍ତି । ବାସୁଦେବପୁର ବିଡିଓଙ୍କ ସହ ଯୋଗାଯୋଗ କରିବାରୁ ଭଦ୍ରକ ସ୍ଥାନାନ୍ତର କରିବୁ ବୋଲି କହିଛନ୍ତି ।