୫ମ ଥର ପାଇଁ ମୁଖ୍ୟମନ୍ତ୍ରୀ ଭାବେ ଶପଥ ନେଲେ ନେଇଫିଉ ରିଓ

ନାଗାଲାଣ୍ଡ(ବଡ଼ ଖବର ବ୍ୟୁରୋ): ନାଗାଲାଣ୍ଡ ମୁଖ୍ୟମନ୍ତ୍ରୀ ଭାବେ ଶପଥ ନେଇଛନ୍ତି ନେଇଫିଉ ରିଓ । ରାଜନୀତିର ବରିଷ୍ଠ ନେତା ତଥା ଏନଡିପିପିର ମୁଖ୍ୟ ନେଇଫିଉ ରିଓ ଆଜି ୫ମ ଥର ପାଇଁ ମୁଖ୍ୟମନ୍ତ୍ରୀ ଭାବେ ଶପଥ ନେଇଛନ୍ତି। ଶପଥପାଠ ଉତ୍ସବରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହ, ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା ଓ ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱଶର୍ମା ପ୍ରମୁଖ ଉପସ୍ଥିତ ଥିଲେ। ନାଗାଲାଣ୍ଡ ରାଜ୍ୟପାଲ ଲା ଗଣେଶନ ଆଜି କୋହିମାରେ ଅନୁଷ୍ଠିତ ସ୍ୱତନ୍ତ୍ର କାର୍ୟ୍ୟକ୍ରମରେ ରିଓଙ୍କୁ ପଦ ଓ ଗୋପନୀୟତାର ଶପଥପାଠ କରାଇଛନ୍ତି।

ରିଓଙ୍କ ଡେପୁଟି ବା ନାଗାଲାଣ୍ଡର ଉପ ମୁଖ୍ୟମନ୍ତ୍ରୀ ଭାବେ ଦୁଇ ଜଣ ଶପଥ ନେଇଛନ୍ତି। ଟିଆର ଜେଲିଆଙ୍ଗ ଓ ୟାନଥୁଙ୍ଗୋ ପାଟ୍ଟୋନ ଉପ ମୁଖ୍ୟମନ୍ତ୍ରୀ ହୋଇଛନ୍ତି। ଏବଂ ନାଗାଲାଣ୍ଡ କ୍ୟାବିନେଟରେ ସାମିଲ ହେବାକୁ ଥିବା ୯ ଜଣଙ୍କୁ ମଧ୍ୟ ରାଜ୍ୟପାଳ ଆଜି ଶପଥ ପାଠ କରାଇଛନ୍ତି। ରିଓଙ୍କ କ୍ୟାବିନେଟରେ ଜି କାଇତୋ ଆୟେ, ଜ୍ୟାକବ ଝିମୋମି, କେଜି କେନୟେ, ପି ପାଇୱାଙ୍ଗ କୋନୟାକ, ମେଟସୁବୋ ଜମିର, ତେମଜେନ ଇମନା ଆଲୋଙ୍ଗ, ସିଏଲ ଜନ, ଏସ୍‌ କୁରସେ ଓ ପି ବାଶଙ୍ଗମୋଙ୍ଗବା ସାମିଲ ହୋଇଛନ୍ତି।