ଭୁବନେଶ୍ୱର (ବଡ ଖବର ବ୍ୟୁରୋ): ବିଜେଡିର ଟାଣୁଆ ନେତା ତଥା ପିପିଲି ବିଧାୟକ ପ୍ରଦୀପ ମହାରଥୀଙ୍କ ବିୟୋଗ ରାଜ୍ୟରେ ଶୋକର ଛାୟା ଖେଳାଇଦେଇଛି । ଗୁରୁତର ଅସୁସ୍ଥ ଥାଇ ଭୁବନେଶ୍ୱରର ଏକ ଘରୋଇ ହସ୍ପିଟାଲରେ ଚିକିତ୍ସିତ ହେଉଥିବା ବେଳେ ତାଙ୍କର ଶନିବାର ରାତି ୨ଟା ୩୬ ମିନିଟରେ ମୃତ୍ୟୁ ହୋଇଛି । ଖବର ପାଇ ବିଜେଡିର ବହୁ ମନ୍ତ୍ରୀ ଓ ନେତା ହସ୍ପିଟାଲରେ ପହଞ୍ଚିଥିଲେ । ପରେ ପାର୍ଥିବ ଶରୀରକୁ ଭୁବନେଶ୍ୱରରେ ଥିବା ସରକାରୀ ବାସଭବନକୁ ଅଣାଯାଇଥିଲା । ଆଜି ସକାଳେ ବିଧାନସଭା ଅଭିମୁଖେ ବାହାରିଥିଲା ଶବ ଶୋଭାଯାତ୍ରା । ବିଧାନସଭା ପରିସରରେ ପ୍ରଥମେ ବାଚସ୍ପତି ସୂର୍ଯ୍ୟନାରାୟଣ ପାତ୍ର ଶ୍ରଦ୍ଧାଞ୍ଜଳୀ ଅର୍ପଣ କରିଥିଲେ । ପରେ ସ୍ୱାସ୍ଥମନ୍ତ୍ରୀ ନବ ଦାସ,ସଂସଦୀୟ ମନ୍ତ୍ରୀ ବିକ୍ରମ କେଶରୀ ଆରୁଖଙ୍କ ସମେତ ବହୁ ମନ୍ତ୍ରୀ, ବିଜେଡି ନେତା ଶେଷ ଦର୍ଶନ କରିବା ସହ ଶବାଧାରରେ ପୁଷ୍ପଗୁଚ୍ଛ ଅର୍ପଣ କରିଥିଲେ । ସେଠାରୁ ଶବ ଶୋଭାଯାତ୍ରା ବିଜେଡି ରାଜ୍ୟ କାର୍ଯ୍ୟାଳୟ ଅଭିମୁଖେ ବାହାରିଥିଲା । ପିପିଲିରେ ଥିବା ତାଙ୍କ ଫାର୍ମ ହାଉସ ଓ ବାସଭବନକୁ ନିଆଯିବ । ପୁରୀ ସ୍ୱର୍ଗଦ୍ୱାର ନିଆଯାଇ ଅପରାହ୍ନରେ ଶେଷକୃତ୍ୟ ସମ୍ପୂର୍ଣ୍ଣ କରାଯିବ ବୋଲି ପରିବାର ପକ୍ଷରୁ କୁହାଯାଇଛି ।
ଶବାଧାରରେ ତାଙ୍କ ପତ୍ନୀ ପ୍ରଫେସର ପ୍ରତିଭା ମହାରଥୀ,ଝିଅ ଡାକ୍ତର ପଲ୍ଲବୀ ମହାରଥୀ,ପୁଅ ରୁଦ୍ର ପ୍ରତାପ ମହାରଥୀ ଓ ଆତ୍ମୀୟସ୍ୱଜନମାନେ ସାମିଲ ହୋଇଛନ୍ତି ।
ପିପିଲି ନିକଟସ୍ଥ ଖୋରାପଡାରେ ୧୯୫୫ ଜୁଲାଇ-୪ ତାରିଖରେ ସେ ଜନ୍ମଗ୍ରହଣ କରିଥିଲେ । ଗୋକୁଳନନ୍ଦ ମହାରଥୀଙ୍କ ସେ ହେଉଛନ୍ତି ବଡପୁଅ । ଛାତ୍ର ଜୀବନରୁ ରାଜନୈତିକ ଜୀବନ ସେ ଆରମ୍ଭ କରିଥିଲେ । ୧୯୮୫ ମସିହାରେ ପ୍ରଥମଥର ପାଇଁ ସେ ପିପିଲି ନିର୍ବାଚନମଣ୍ଡଳୀରୁ ଜନତା ଦଳ ଟିକେଟରେ ବିଧାନସଭାକୁ ନିର୍ବାଚିତ ହୋଇଥିଲେ । ୧୯୯୦ରେ ସେ, ସେହି ନିର୍ବାଚନମଣ୍ଡଳୀରୁ ବିଧାନସଭାରେ ପ୍ରତିନିଧିତ୍ୱ କରିଥିଲେ । କିନ୍ତୁ ୧୯୯୫ ତାଙ୍କୁ ପରାଜୟର ସ୍ୱାଦ ଚାଖିବାକୁ ପଡିଥିଲା । ପରେ ସେ ବିଜେଡିରେ ଯୋଗଦେଇଥିଲେ । ୨୦୦୦ ମସିହାଠାରୁ ଲଗାତାର ସେ ୫ଥର ବିଧାନସଭାକୁ ନିର୍ବାଚିତ ହୋଇଥିଲେ । କୃଷିମନ୍ତ୍ରୀ,ପଞ୍ଚାୟତିରାଜ ମନ୍ତ୍ରୀ ଭାବେ ସେ ଦକ୍ଷତାର ସହ କାମ କରିଛନ୍ତି ।
