ଆଜି ଓଡ଼ିଶା ଆସୁଛନ୍ତି ରାହୁଲ, ଦଳୀୟ କର୍ମକର୍ତ୍ତାଙ୍କୁ ଦେବେ ଗୁରୁମନ୍ତ୍ର

ଭୁବନେଶ୍ୱର (ବଡ଼ ଖବର ବ୍ୟୁରୋ): ସୁପର ସଣ୍ଡେରେ ହେବ ସୁପର ସୋ । ମୁହାଁମୁହିଁ ହେବେ କଂଗ୍ରେସର ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧୀ ଓ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା । ହେବ ହାଇଭୋଲଟେଜ ପ୍ରଚାର । ରାହୁଲ ଓ ନଡ୍ଡା ନିଜର କର୍ମୀଙ୍କୁ କ’ଣ ଗୁରୁମନ୍ତ୍ର ଦେଉଛନ୍ତି ତାହା ଉପରେ ରହିଛି ସମସ୍ତଙ୍କ ନଜର । ରାହୁଲ ଭୁବନେଶ୍ୱର ଏୟାରପୋର୍ଟରୁ ହେଲିକପ୍ଟରରେ ଆସି ସାଲେପୁର ନିକଟ ସତ୍ୟଭାମାପୁର ପଡ଼ିଆରେ ଦିନ ପ୍ରାୟ ୧୧ଟା ୪୦ ବେଳେ ଓହ୍ଲାଇବେ ।

ସେଠାରୁ କଡ଼ା ସୁରକ୍ଷା ବଳୟରେ କାର୍କେଡରେ ଯାଇ ୭ ଶହ ମିଟର ଦୂର ଉତ୍କଳଗୌରବ ମଧୁସୂଦନ ଦାସଙ୍କ ଜନ୍ମସ୍ଥାନରେ ତାଙ୍କ ଜୟନ୍ତୀରେ ମଧୁବାବୁଙ୍କୁ ଶ୍ରଦ୍ଧାଞ୍ଜଳି ଜଣାଇବେ । ପୁଣି ସତ୍ୟଭାମାପୁର ପଡ଼ିଆକୁ ଫେରି ହେଲିକପ୍ଟରରେ ନିଶ୍ଚିନ୍ତକୋଇଲି ବ୍ଲକ କୁଳିଆ ପଡ଼ିଆରେ ଆୟୋଜିତ ସାଧାରଣ ସଭାସ୍ଥଳକୁ ଯାଇ ଉଦ୍ବୋଧନ ଦେବେ । ସଭାସ୍ଥଳରେ କାର୍ଯ୍ୟକ୍ରମ ୧୨ଟାରୁ ୨ଟା ପର୍ଯ୍ୟନ୍ତ ରହିଛି । ସଭାସ୍ଥଳରେ ରାହୁଲ୍ ପ୍ରାୟ ଏକ ଘଣ୍ଟା ରହିବେ ।

ସଭାମଞ୍ଚରେ ପିସିସି ସଭାପତି ଶରତ ପଟ୍ଟନାୟକଙ୍କ ସମେତ ଦଳର ବିଧାୟକଗଣ, ପୂର୍ବତନ ପିସିସି ସଭାପତି ନିରଞ୍ଜନ ପଟ୍ଟନାୟକ, ପ୍ରସାଦ ହରିଚନ୍ଦନ, ଜୟଦେବ ଜେନା, ରାଜ୍ୟ ପ୍ରଚାର କମିଟି ଅଧ୍ୟକ୍ଷ ଭକ୍ତ ଚରଣ ଦାସ, କଟକ ଜିଲ୍ଲା କଂଗ୍ରେସ ସଭାପତି ମାନସ ଚୌଧୁରୀ, କେନ୍ଦ୍ରାପଡ଼ା ଲୋକସଭା ପ୍ରାର୍ଥୀ ସିଦ୍ଧାର୍ଥ ସ୍ୱରୂପ ଦାସ, ସାଲେପୁର ପ୍ରାର୍ଥୀ ଆକ୍ୟୁବ୍ ଉଜ୍ଜାମନ୍ ଖାନ୍ ପ୍ରମୁଖ ଦଳର ବରିଷ୍ଠ ନେତା ଉପସ୍ଥିତ ରହିବେ ବୋଲି ଜଣାପଡ଼ିଛି । ରାହୁଲଙ୍କ କାର୍ଯ୍ୟକ୍ରମ ପାଇଁ ରାଜ୍ୟ କଂଗ୍ରେସ ଶିବିର ଚଳଚଞ୍ଚଳ ହୋଇପଡ଼ିଛି ।