‘ତୋର ମୋର ଯୋଡି ସୁନ୍ଦର’ ପ୍ରମାଣ ଦେଲେ ସବ୍ୟସାଚୀ ଓ ଅର୍ଚିତା

ଭୁବନେଶ୍ୱର (ବଡ଼ ଖବର ବ୍ୟୁରୋ): ଆଜି ବିବାହ ଭଳି ପବିତ୍ର ବନ୍ଧନରେ ବାନ୍ଧି ହେବାକୁ ଯାଉଛନ୍ତି ଓଲିଉଡର ସୁପରହିଟ ଯୋଡି ସବ୍ୟସାଚୀ ଓ ଅର୍ଚିତା । ଦୁହିଁଙ୍କ ଯୋଡିକୁ ଚଳଚ୍ଚିତ୍ରରେ ଲୋକମାନେ ବେଶ ଭଲ ପାଇବା ଦେଇଥିବା ବେଳେ ଆଜି ଏହା ଏକ ନୂଆ ରୂପ ନେବାକୁ ଯାଉଛି । ଆଉ କିଛି ଘଣ୍ଟା ବ୍ୟବଧାନ ମଧ୍ୟରେ ଦୁଇଜଣ ରାଜସ୍ଥାନର ଏକ ଭବ୍ୟମଣ୍ଡପରେ ବିବାହ କରିବାକୁ ଯାଉଛନ୍ତି । ସାମାଜିକ ଗଣମାଧ୍ୟମରେ ଏହି ଖବର ପ୍ରସାରିତ ହେବା ପରେ ଉଭୟଙ୍କ ପାଇଁ ପ୍ରଶଂସକ ଓ ଓଲିଉଡ କଳାକାରଙ୍କ ନିକଟରୁ ଶୁଭେଚ୍ଛାର ସୁଅ ଛୁଟିଛି ।

ଉଭୟ ୨୦୦୮ ମସିହା ସଞ୍ଜୟ ନାୟକଙ୍କ ଚଳଚ୍ଚିତ୍ର ‘ମୁଁ ସପନର ସୌଦାଗର’ ରେ ଏକାଠି କାମ କରିଥିଲେ । ଏହାପରେ ଦୁହେଁ ନାୟକ-ନାୟିକା ଭାବେ ‘ତୋର ମୋର ଯୋଡି ସୁନ୍ଦର’, ‘କେବେ ତୁମେ ନାହଁ କେବେ ମୁଁ ନାହିଁ’, ‘ମୁଁ ଏକା ତୁମର’, ‘ହେଲା ମତେ ପ୍ରେମ ଜର’, ‘ପିଲାଟା ବିଗିଡି ଗଲା’, ‘କେଉଁ ଦୁନିଆରୁ ଆସିଲ ବନ୍ଧ’ୁ, ‘ମତେ ଆଣିଦେଲ ଲକ୍ଷେ ଫଗୁଣ’, ‘ପାଗଳ କରିଛି ପାଉଁଜି ତୋର ଓ ଛାତି ତଳେ ଡିଙ୍ଗଡଙ୍ଗ୍’, ଆଦି ଚଳଚ୍ଚିତ୍ର ଅଭିନୟ କରିଛନ୍ତି । ଦୁହେଁ ଅନେକ ଫିଲ୍ମ କରି ଦର୍ଶକଙ୍କ ପ୍ରଶଂସା ସାଉଁଟିଛନ୍ତି ।