ଦିଲ୍ଲୀରେ ଏକ ମାସ ପର୍ଯ୍ୟନ୍ତ ଲାଗୁ ହେଲା ୧୪୪

ନୂଆଦିଲ୍ଲୀ (ବଡ଼ ଖବର ବ୍ୟୁରୋ): କୃଷକଙ୍କ ଆନ୍ଦୋଳନକୁ ଦୃଷ୍ଟିରେ ରଖି ରାଜଧାନୀ ଦିଲ୍ଲୀର ସୀମା ବନ୍ଦ ରହିଛି। ଏହା ବ୍ୟତୀତ ଦିଲ୍ଲୀରେ କୃଷକଙ୍କ ପ୍ରବେଶକୁ ରୋକିବା ପାଇଁ ସୀମାରେ ପୋଲିସ ଫୋର୍ସ ମୁତୟନ କରାଯାଇଛି। କୃଷକଙ୍କ ଆନ୍ଦୋଳନକୁ ଦୃଷ୍ଟିରେ ରଖି ମାର୍ଚ୍ଚ ୧୨ ପର୍ଯ୍ୟନ୍ତ ସମଗ୍ର ଦିଲ୍ଲୀରେ ଧାରା ୧୪୪ ଲାଗୁ କରାଯାଇଛି। ଏହା ପୂର୍ବରୁ ପୋଲିସ ଦିଲ୍ଲୀ ସୀମାରେ ଧାରା ୧୪୪ ଲାଗୁ କରିଥିଲେ କିନ୍ତୁ ଏବେ ପୁରା ସହରରେ ଲାଗୁ କରିବା ପାଇଁ ଘୋଷଣା କରିଛନ୍ତି ।

କୃଷକମାନଙ୍କର ‘ଦିଲ୍ଲୀ ଚାଲୋ’ଘୋଷଣା ପରେ ଏହି ନିଷ୍ପତ୍ତି ନିଆଯାଇଛି । ଏହାସହିତ ଦିଲ୍ଲୀର ସୀମାରେ ବି ସୁରକ୍ଷା ବ୍ୟବସ୍ଥା ବହୁତ କଡାକଡି କରି ଦିଆଯାଇଛି । ସୀମାକୁ ବ୍ୟାରିକେଡ୍ କରି ବନ୍ଦ କରି ଦିଆଯାଇଛି । ସେହିପରି ପୋଲିସ ନିଜ ଗୁଇନ୍ଦା ବ୍ୟବସ୍ଥାକୁ ବି ସତର୍କ କରାଇ ଦେଇଛି । ୧୪୪ ଧାରା ଲାଗୁ ହେବା ପରେ ୫ କିମ୍ବା ଏହାଠାରୁ ଅଧିକ ବ୍ୟକ୍ତି ଗୋଟିଏ ସ୍ଥାନରେ ଏକତ୍ରୀତ ହୋଇପାରିବେ ନାହିଁ । ଏହାର ପାଳନ ନ କରିବା ଆଇନର ଉଲଙ୍ଘନ ବୋଲି ମନେ କରାଯିବ । ବିଶେଷ କାର୍ଯ୍ୟକ୍ରମ ଲାଗି ପୋଲିସ ଠାରୁ ଅନୁମତି ନେବାକୁ ହେବ ।