ଅଭିଶପ୍ତ ତାରିଆ
ରଣପୁର (ବଡ଼ ଖବର ବ୍ୟୁରୋ): ବାଟ ହୁଡୁଛି ଯୋଜନା । ଗାଁକୁ ବିଶୁଦ୍ଧ ପାନୀୟ ଜଳଯୋଗାଣ ପାଇଁ ସରକାର ପ୍ରତିଶ୍ରୁତିବଦ୍ଧ । ପ୍ରତି ଗ୍ରାମ୍ୟ ସ୍ତରରେ ସରକାର ସ୍ୱଚ୍ଛତା ଓ ପରିମଳ ଉପରେ ଗୁରୁତ୍ୱ ଦେଇ ବାଃ ବାଃ ନେଉଛନ୍ତି । ବାସ୍ତବରେ କିନ୍ତୁ ଚିତ୍ର ଓଲଟା । ଯାହାର ଏକ ବିକଳ ଚିତ୍ର ଦେଖିବାକୁ ମିଳିଛି ରଣପୁର ବ୍ଲକ ଖଇରପଲ୍ଲୀ ପଞ୍ଚାୟତ ତାରିଆ ଗ୍ରାମରେ ।
ଗ୍ରାମବାସୀ ବ୍ୟବହାର କରୁଥିବା ପାଣିରେ ଫ୍ଲୋରାଇଡ଼ ଅଂଶ ଅଧିକ ରହୁଛି । ଗାଁର ଏକାଧିକ ଲୋକ ଗତ ୬ ମାସ ଭିତରେ କିଡ୍ନୀ ରୋଗରେ ଆକ୍ରାନ୍ତ ହୋଇ ମୃତ୍ୟବରଣ କଲେଣି । ଏବେ ମଧ୍ୟ ଗାଁର ଏକାଧିକ ଲୋକ କିଡ୍ନୀ ରୋଗରେ ଆକ୍ରାନ୍ତ । ପ୍ରଶାସନିକ ଅଧିକାରୀଙ୍କୁ ଏ ନେଇ ବାରମ୍ବାର ଅବଗତ କରାଇଲେ ମଧ୍ୟ କିଛି ସୁଫଳ ମିଳୁନାହିଁ । ଜିଲ୍ଲାପାଳଙ୍କୁ ମଧ୍ୟ ଏ ସମ୍ପର୍କରେ ଅବଗତ କରାଯାଇଛି । ଦୀର୍ଘଦିନ ବିତିଯାଇଥିଲେ ସୁଦ୍ଧା ଏଯାବତ କିଛି ସାହାଯ୍ୟ ମିଳିନଥିବାରୁ ଗ୍ରାମବାସୀ ଦୁଃଖ ପ୍ରକାଶ କରିଛନ୍ତି । ଜଳର ଉପଯୁକ୍ତ ମାନ ପରୀକ୍ଷା କରାଇ ଏକ ସ୍ଥାୟୀ ବ୍ୟବସ୍ଥା କରିବା ପାଇଁ ଗାଁ ଲୋକେ ପ୍ରଶାସନ ନିକଟରେ ଦାବି କରିଛନ୍ତି ।