ଘରେ ଘରେ ରାସନ ପହଞ୍ଚାଇବାକୁ ନେଇ କେନ୍ଦ୍ର ଓ ଦିଲ୍ଲୀ ସରକାର ମୁହାଁମୁହିଁ
ନୂଆଦିଲ୍ଲୀ(ବଡ଼ ଖବର ବ୍ୟୁରୋ): ଦିନକୁ ଦିନ ଜୋର ଧରୁଛି କେନ୍ଦ୍ର ଓ ଦିଲ୍ଲୀ ସରକାରଙ୍କ ମଧ୍ୟରେ ରାସନ ରାଜନୀତି । ଅରବିନ୍ଦ କେଜ୍ରିୱାଲ ଦିଲ୍ଲୀରେ ଡୋର ଟୁ ଡୋର ରାସନ ପହଞ୍ଚାଇବା ପାଇଁ ଘୋଷଣା କରିବା ପରେ ଏବେ ବିଜେପି ଓ ଆମ ଆଦମୀ ପାର୍ଟି ମଧ୍ୟରେ ଆରମ୍ଭ ହୋଇଯାଇଛି ତୁତୁ ମେମେ । ଉଭୟ ଉଭୟଙ୍କୁ ସମାଲୋଚନା କରିବାରେ ଲାଗିଛନ୍ତି । ବିଜେପି କହିଛି ଯେଉଁ ସରକାର ଅକ୍ସିଜେନ ଓ ମେଡିସିନ ଲୋକଙ୍କୁ ଯୋଗାଇ ପାରୁ ନି ସେ କଣ ରାସନ ଯୋଗାଇବ ।
ସେପଟେ ଏହାର ଜବାବରେ ଦିଲ୍ଲୀ ଉପମୁଖ୍ୟମନ୍ତ୍ରୀ ମନିଷ ସିସୋଦିଆ କହିଛନ୍ତି ବିଜେପିର ନାମ ଭାରତୀୟ ଜନତା ପାର୍ଟି ନହୋଇ ଭାରତୀୟ ଝଗଡ଼ା ପାର୍ଟି ହେବା ଦରକାର । ଏକ ସାମ୍ବାଦିକ ସମ୍ମିଳନୀ ଜରିଆରେ ସିସୋଦିଆ କେନ୍ଦ୍ରମନ୍ତ୍ରୀ ରବିଶଙ୍କର ପ୍ରସାଦଙ୍କ ମନ୍ତବ୍ୟର କଡ୍ଡା ଜବାବ ଦେଇଛନ୍ତି । ତାଙ୍କ ନାମ ନନେଇ ସିସୋଦିଆ କହିଛନ୍ତି ଆଜିକାଲି କେନ୍ଦ୍ରମନ୍ତ୍ରୀ ମାନଙ୍କର ଗୋଟିଏ କାମ ରହିଛି କେବଳ ଅରବିନ୍ଦ କେଜ୍ରିୱାଲଙ୍କୁ ଗାଳି ଦେବା ।