ଫୁଲିଲା ସୁବର୍ଣ୍ଣରେଖା: ବିପଦ ସଙ୍କେତ ଉପରେ ଜଳସ୍ତର

ଜଳେଶ୍ୱର(ବଡ଼ ଖବର ବ୍ୟୁରୋ): ପୁଣି ଫୁଲିଲା ସୁବର୍ଣ୍ଣରେଖା । ଜଳେଶ୍ୱର ରାଜଘାଟ ଠାରେ ବିପଦ ସଙ୍କେତ ଉପରେ ପ୍ରବାହିତ ହେଉଛି ସୁବର୍ଣ୍ଣରେଖା ନଦୀର ଜଳସ୍ତର। ଲଘୁଚାପ ବର୍ଷା ଯୋଗୁଁ ବାରମ୍ବାର ସୁବର୍ଣ୍ଣରେଖା ନଦୀର ଜଳସ୍ତର ବଢିବା ଫଳରେ ଲୋକଙ୍କୁ ବନ୍ୟା ଭୟ । ସୁବର୍ଣ୍ଣରେଖା ନଦୀର ଉପରମୁଣ୍ତରେ ପ୍ରବଳ ବର୍ଷା ହେବା ଯୋଗୁଁ ନଦୀର ଜଳସ୍ତର କ୍ରମଶଃ ବୃଦ୍ଧି ପାଇବାରେ ଲାଗିଛି ।

ଦିନ ୧୧ ବେଳକୁ ୧୦.୫୫ ମିଟରକୁ ଛୁଇଁବ ଜଳ । ବିଶେଷ କରି ଗତକାଲି ଝାଡଖଣ୍ତର ଗାଲୁଡିହି ବ୍ୟାରେଜର ୧୧ଟି ଗେଟ ଖୋଲିଥିବା ପରେ ସୁବର୍ଣ୍ଣରେଖା ନଦୀକୁ ପ୍ରବେଶ କରୁଛି ପାଣି । ଯାହାଫଳରେ ସୁବର୍ଣ୍ଣରେଖା ନଦୀ ଫୁଲିବା ସହ ବନ୍ୟା ଦେଖାଦେଇଛି। ସୁବର୍ଣ୍ଣରେଖା ନଦୀର ରାଜଘାଟ ଠାରେ ବିପଦ ସଙ୍କେତ ୧୦.୩୬ ମିଟର ଥିବା ବେଳେ ଆଜି ସକାଳ ୯ଟା ସୁଦ୍ଧା ୧୦.୩୬ ମିଟର ଉପରେ ପ୍ରବାହିତ ହେଉଛି । ଜଳେଶ୍ୱର, ବାଲିଆପାଳ, ଭୋଗରାଇ ତଳିଆ ଅଂଚଳର କିଛି ଗାଁରେ ବନ୍ୟା ପାଣି ପ୍ରବେଶ କରିଥିବା ଜଣାପଡ଼ିଛି ।