୧ ନଭେମ୍ବରରୁ ଘରେ ପହଞ୍ଚିବ ରାଶନ

ଭୋପାଳ(ବଡ଼ ଖବର ବ୍ୟୁରୋ): ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ଶିବରାଜ ସିଂହଙ୍କ ବଡ଼ ଘୋଷଣା । ୧ ନଭେମ୍ବରରୁ ସମସ୍ତଙ୍କ ଘରେ ପହଞ୍ଚିବ ରାଶନ । ମଧ୍ୟପ୍ରଦେଶ ଫାଉଣ୍ଡେସନ ଦିବସ ଅବସରରେ ୮୯ଟି ଆଦିବାସୀ ବ୍ଲକରେ ସମସ୍ତ ହିତାଧୀକାରୀଙ୍କ ଘରେ ରାଶନ ପହଞ୍ଚିବାର କଥା ସାମ୍ନାକୁ ଆସିଛି । ଅପରପକ୍ଷରେ ସ୍ୱାଧୀନତା ସଂଗ୍ରାମରେ ଯୋଗ ଦେଇଥିବା ଆଦିବାସୀ ନେତାଙ୍କ ପାଇଁ ଆୟୋଜିତ ଗର୍ବ ଦିବସ ପାଳନର ଏକ କାର୍ଯ୍ୟକ୍ରମରେ ଯୋଗଦେଇ ମୁଖ୍ୟମନ୍ତ୍ରୀ ଏପରି ଘୋଷଣା କରିଥିବାର ସୂଚନା ଆସିଛି । ଗର୍ବ ଦିବସ ପାଳନ କାର୍ଯ୍ୟକ୍ରମରେ ଗୃହମନ୍ତ୍ରୀ ଅମିତ ଶାହ ମଧ୍ୟ ଉପସ୍ଥିତ ଥିଲେ । ତେବେ କେବଳ ଭାଜପା ସରକାର ଆଦିବାସୀ ସମାଜ ପାଇଁ କାର୍ଯ୍ୟ କରୁଛନ୍ତି ।

ଯେତେବେଳେ ଅଟଳ ବିହାରୀ ବାଜପେୟୀ ଭାରତର ପ୍ରଧାନମନ୍ତ୍ରୀ ଥିଲେ, ସେତେବେଳେ ପ୍ରଥମ କରି ଆଦିବାସୀ ସମ୍ପ୍ରଦାୟ ପାଇଁ ଏକ ସ୍ୱତନ୍ତ୍ର ମନ୍ତ୍ରଣାଳୟ ଗଠନ କରାଯାଇଥିଲା ବୋଲି ଶିବରାଜ କହିଛନ୍ତି । କେବଳ ଏତିକି ନୁହେଁ ବରଂ କଂଗ୍ରେସ ସରକାର ସମୟରେ ଆଦିବାସୀ ସମ୍ପ୍ରଦାୟର ଛାତ୍ରଛାତ୍ରୀମାନଙ୍କୁ ମାତ୍ର ୨୦୦-୩୦୦ ଟଙ୍କାର ବୃତ୍ତି ପ୍ରଦାନ କରାଯାଉଥିଲା । ଏହି ଛାତ୍ରବୃତ୍ତିର ପରିମାଣ ଭାଜପା ସରକାର ବୃଦ୍ଧି କରି ଏହାକୁ ବର୍ତ୍ତମାନ ୧୨୦୦-୧୩୦୦ ଟଙ୍କା କରିଛନ୍ତି । ଅନ୍ୟପଟେ ଦେଶର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଦିବାସୀ ସମ୍ପ୍ରଦାୟର ହଜିଯାଇଥିବା ପରିଚୟ ଫେରାଇ ଆଣିବାକୁ ନିଷ୍ପତ୍ତି ନେଇଛନ୍ତି ବୋଲି ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ଶିବରାଜ ସିଂହ ଚୌହାନ ଗଣମାଧ୍ୟମ ନିକଟରେ ସ୍ପଷ୍ଟ କରିଛନ୍ତି ।