ଉତ୍ତରପ୍ରଦେଶ(ବଡ଼ ଖବର ବ୍ୟୁରୋ): ୨୦୨୨ରେ ହେବାକୁ ଯାଉଛି ଦେଶର ସବୁଠାରୁ ବଡ଼ ରାଜ୍ୟରେ ବିଧାନସଭା ନନିର୍ବାଚନ । ସବୁ ରାଜନୈତିକ ଦଳର ଆଖି ଏବେ ୟୁପି ରାଜନୀତି ଉପରେ । ଏଠାରେ ବିଜେପିର ଯୋଗୀ ସରକାରଙ୍କୁ ଟକ୍କର ଦେବାକୁ ସବୁ ଦଳ ଲାଗି ପଡ଼ିଛନ୍ତି । ବିଭିନ୍ନ ମାମଲାରେ ସରକାରକୁ ଘେରିବାକୁ ମଧ୍ୟ ଚେଷ୍ଟା କରୁଛନ୍ତି । ତେବେ ସମାଜବାଦୀ ପାର୍ଟିର ନେତା ଅଖିଳେଶ ଯାଦବ ଓ କଂଗ୍ରେସର ପ୍ରିୟଙ୍କା ଗାନ୍ଧି ଏବେ ୟୁପି ଗାଦି ହାତେଇବାକୁ ରଣନୀତି ପ୍ରସ୍ତୁତ କରୁଛନ୍ତି । ୟୁପିରେ ସପା ଜିତିକି ଅଛି ବୋଲି ଅଖିଳେଶ କହୁଥିବା ବେଳେ ଏବେ ପ୍ରିୟଙ୍କା ଗାନ୍ଧି ଘରକୁ ଘର ବୁଲୁଥିବା ନଜର ଆସୁଛି ।
ତେବେ କଂଗ୍ରେସ ଏହା ମଧ୍ୟରେ ଲୋକଙ୍କ ପାଖରେ ନିର୍ବାଚନୀ ଇସ୍ତହାର ଗୋଟିଏ ପରେ ଗୋଟିଏ ରଖୁଛି । କଂଗ୍ରେସ ଶାସନକୁ ଆସିଲେ ଋଣ ଛାଡ଼ ହେବା ସହ ୨୦ ଲକ୍ଷ ବେକାର ଯୁବକ ଯୁବତୀଙ୍କୁ ରୋଜଗାର ଯୋଗାଇ ଦିଆଯିବ ବୋଲି ଘୋଷଣା କରିଛନ୍ତି ପ୍ରିୟଙ୍କା ଗାନ୍ଧି । କେବଳ ଏତିକି ନୁହେଁ ଲୋକଙ୍କୁ ବିଜୁଳି ବିଲ୍ ମଧ୍ୟ ଛାଡ଼ କରିବ ଦଳ । ସେହିଭଳି କୋଭିଡ୍ ପୀଡ଼ିତ ମାନଙ୍କୁ ୨୫ହଜାର ଟଙ୍କା ଦିଆଯିବ ବୋଲି ପ୍ରତିଶ୍ରୁତି ଦେଇଛନ୍ତି ପ୍ରିୟଙ୍କା ଗାନ୍ଧି । ଯଦି ଦଳ କ୍ଷମତାକୁ ଆସେ ତେବେ ଏସବୁ ପ୍ରତିଶ୍ରୁତି ପୂରଣ କରିବା ସହିତ ଆଉ ୩ଟି ସ୍କିମ୍ ମଧ୍ୟ ଘୋଷଣା କରିଥିଲେ । ଆସନ୍ତା ବିଧାନ ସଭା ନିର୍ବାଚନରେ ମହିଳାମାନଙ୍କୁ ୪୦ ପ୍ରତିଶତ ଟିକେଟ୍ ସଂରକ୍ଷଣ ସହିତ, ଦ୍ୱାଦଶ ଓ ସ୍ନାତକ ପାସ୍ କରିଥିବା ଛାତ୍ରୀମାନଙ୍କୁ ସ୍ମାର୍ଟ ଫୋନ୍ ଏବଂ ବିଦ୍ୟୁତ୍ ଚାଳିତ ସ୍କୁଟି ଯୋଗାଇ ଦିଆଯିବ ସହ ଆଗାମୀ ଦିନରେ ମହିଳାମାନଙ୍କ ପାଇଁ ସ୍ୱତନ୍ତ୍ର ଇସ୍ତାହାର ଯୋଗାଇ ଦିଆଯିବ ବୋଲି ପ୍ରିୟଙ୍କା ଘୋଷଣା କରିଛନ୍ତି ।
