ବଲାଙ୍ଗିର, (ବଡ଼ ଖବର ବ୍ୟୁରୋ): ପ୍ରାଥମିକ ବିଦ୍ୟାଳୟ ବନ୍ଦ ନିଷ୍ପତ୍ତିକୁ ବିରୋଧ କରିଛି ଭିଲେଜର୍ଷ ଇଣ୍ଡିଆ ପାର୍ଟି । ଏହାର ପ୍ରତିବାଦରେ ଆସନ୍ତା ୧୯ ତାରିଖରେ ଓଡ଼ିଶା ବନ୍ଦ ଡାକରା ଦେଇଛି ଭିଲେଜର୍ଷ ଇଣ୍ଡିଆ ପାର୍ଟି। ଏନେଇ ବଲାଙ୍ଗିର ସାମ୍ବାଦିକ ଭବନରେ ଆୟୋଜିତ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ଭିଆଇପିର ରାଜ୍ୟ ସଭାପତି ଡ. ବିପିନ କୁଶୁଲିଆ। ରାଜ୍ୟରେ ହଜାର ହଜାର ପ୍ରାଥମିକ ବିଦ୍ୟାଳୟ ଗୁଡିକୁ ବନ୍ଦ କରିବାକୁ ରାଜ୍ୟ ସରକାର ନିଷ୍ପତି ନେଇଛନ୍ତି। ସେଥିମଧ୍ୟରୁ କେବଳ ବଲାଙ୍ଗିର ଜିଲ୍ଲାର ୨୯୬ ବିଦ୍ୟାଳୟ ବନ୍ଦ ହେବାକୁ ଯାଉଛି। ଏଥିସହ ବୌଦ୍ଧ, ଢେଙ୍କାନାଳ, ନବରଙ୍ଗପୁର ଓ ଗଜପତି ଜିଲ୍ଲାରେ ମଧ୍ୟ ବହୁ ବିଦ୍ୟାଳୟ ବନ୍ଦ କରିବାକୁ ନିଷ୍ପତି ନେଇଛି ସ୍କୁଲ ଓ ଗଣଶିକ୍ଷା ବିଭାଗ। ଏହାଫଳରେ ଗାଁ ଗହଳିର ବହୁ ଗରିବ ଶ୍ରେଣୀର ଲୋକେ ଅସୁବିଧା ଭୋଗିବେ। ତେଣୁ ଏହାର ପ୍ରତିବାଦରେ ଆସନ୍ତା ୧୯ ତାରିଖରେ ଓଡ଼ିଶା ବନ୍ଦ ଡାକରା ଦେଇଛି ଭିଆଇପି। ଅନ୍ୟପଟେ ଏହି ନିଷ୍ପତିକୁ ବିରୋଧ କରି ଗାନ୍ଧୀ ଜୟନ୍ତୀଠାରୁ ଜିଲ୍ଲାପାଳଙ୍କ କାର୍ୟ୍ୟାଳୟ ଆଗରେ ଧାରଣା ଜାରି ରହିଛି। ତେବେ ସରକାର ନିଷ୍ପତି ପରିବର୍ତ୍ତନ ନ କରିବା ଯାଏ ଏହି ଧାରଣା ଜାରି ରହିବ ବୋଲି ପାର୍ଟି ପକ୍ଷରୁ ସୂଚନା ଦିଆଯାଇଛି ।
