ଆମକୁ ଗୁଳି କରିଦିଅ: ଆନ୍ଦୋଳନକାରୀ ରେସଲର
ନୂଆଦିଲ୍ଲୀ (ବଡ଼ ଖବର ବ୍ୟୁରୋ):ଜନ୍ତରମନ୍ତରରେ ପୋଲିସ ଏବଂ ରେସଲର ମୁହାଁମୁହିଁ । ସଂସଦ ଅଭିମୁଖେ ଯାଉଥିବାବେଳେ କୁସ୍ତିଯୋଦ୍ଧାଙ୍କୁ ଉଠାଇନେଲା ପୋଲିସ । ଗୋଟିଏ ପଟେ ନୂଆ ସଂସଦ ଭବନ ଉଦଘାଟନ ଚାଲିଥିବା ବେଳେ ଆଉଗୋଟେ ପଟେ ସଂସଦ ଭବନ ଆଡକୁ ଶୋଭାଯାତ୍ରାରେ ବାହାରିଥିଲେ କୁସ୍ତିଯୋଦ୍ଧା । ଦିଲ୍ଲୀର ଜନ୍ତରମନ୍ତରରେ ଆନ୍ଦୋଳନ ଜାରି ରଖିଥିବା କୁସ୍ତିଯୋଦ୍ଧା ମହାପଞ୍ଚାୟତ କରିବାକୁ ନୂଆ ସଂସଦ ଭବନ ଆଡକୁ ଯିବା ବେଳେ ବାଟରେ ଅଟାକାଇଥିଲା ପୋଲିସ । ଏହାପରେ ସେଠାରେ ଉତ୍ତେଜନା ପରିସ୍ଥିତି ଉପୁଜିଛି ।
କେତେକ କୁସ୍ତିଯୋଦ୍ଧା ବ୍ୟାରିକେଡ ପାର୍ ହୋଇ ଭିତରକୁ ପଶିବାକୁ ଉଦ୍ୟମ କରିବା ସମୟରେ ପୋଲିସ ସେମାନଙ୍କୁ ଅଟକ ରଖିଛି । ସେପଟେ ପୋଲିସ ଅଟକାଇବା ପରେ କୁସ୍ତିଯୋଦ୍ଧା ମାନେ କେରଳ ହାଉସ ନିକଟରେ ଧାରଣରେ ବସିଛନ୍ତି । ଏଠାରୁ ନୂଆ ସଂସଦ ଭବନ ମାତ୍ର କିଛି ବାଟ ଦୂରରେ ରହିଛି । ତେବେ ପୋଲିସ ଅଟକାଇବା ବେଳେ କୁସ୍ତିଯୋଦ୍ଧା ବଜରଙ୍ଗ ପୁନିଆ କ୍ଷୋଭର ସହ କହିଥିଲେ, ଆମକୁ ଗୁଳି କରିଦିଅ ।
