ବିପଦ ସଙ୍କେତଠାରୁ ୨ ମିଟର ଉପରେ ପ୍ରବାହିତ ହେଉଛି ଯମୁନା

ନୂଆଦିଲ୍ଲୀ(ବଡ଼ ଖବର ବ୍ୟୁରୋ): ଏବେବି ଦିଲ୍ଲୀରେ ସ୍ଥିତି ବେହାଲ । ଚାରିଆଡେ ଖାଲି ପାଣି ଆଉ ପାଣି । ବିପଦ ସଙ୍କେତଠାରୁ ୨ ମିଟର ଉପରେ ପ୍ରବାହିତ ହେଉଛି ଯମୁନାର ଜଳସ୍ତର । ୪୫ ବର୍ଷର ରେକର୍ଡ ଭାଙ୍ଗିଛି ଯମୁନା । ତଳିଆ ଅଞ୍ଚଳରୁ ଭିଆଇପି ଏରିଆ ଯାଏଁ, ସବୁଆଡ଼େ ଜଳବନ୍ଦୀ ସ୍ଥିତି। ଆଗକୁ ବି କିଛି ଦିନ ବର୍ଷା ଜାରି ରହିବ ବୋଲି ଆକଳନ କରିଛି ପାଣିପାଗ ବିଭାଗ। ଜଳଦୁର୍ଦ୍ଦଶାର ପ୍ରଶମନ ପାଇଁ ଏନଡିଆରଏଫ ସହିତ ସ୍ଥଳସେନା ଓ ନୌସେନାକୁ ନିୟୋଜିତ କରାଯାଇଛି ।

୨୫ହଜାରରୁ ଅଧିକ ଲୋକଙ୍କୁ ଉଦ୍ଧାର ମଧ୍ୟ କରାଯାଇଛି । ଏବଂ ପାଣି ସ୍ରୋତରେ ଭାସିଯାଇ ୩ ଜଣଙ୍କ ଜୀବନ ମଧ୍ୟ ଯାଇଛି । ଯମୁନାରେ ଜଳସ୍ତର କମୁଥିଲେ ବି ପାଣିରେ ଭାସୁଛି କ୍ୟାପିଟାଲ । ସେଣ୍ଟ୍ରାଲ୍ ଦିଲ୍ଲୀ, ଆଇଟିଓ, ରାଜଘାଟ, ହନୁମାନ ମନ୍ଦିର, ଯମୁନା ବଜାର, ଗୀତା କଲୋନି, ସିଭିଲ୍ ଲାଇନ୍, ରିଙ୍ଗରୋଡ୍ ଏପରିକି ସୁପ୍ରିମକୋର୍ଟ ଆଖପାଖ ଅଞ୍ଚଳରେ ଜଳବନ୍ଦୀ ସ୍ଥିତି ଜାରି ରହିଛି । ନଦୀର ଭ୍ରମ ସୃଷ୍ଟି କରୁଛି ରାଜଧାନୀର ରାଜରାସ୍ତା। ରେସ୍କ୍ୟୁ ଅପରେସନରେ ୧୬ଟି ଏନଡିଆରଏଫ ଟିମ୍ ନିୟୋଜିତ ହୋଇଛନ୍ତି ।