ନୀଳଗିରି ବସ୍ଷ୍ଟାଣ୍ଡ ନିକଟ ପେଟ୍ରୋଲ ପମ୍ପରେ ବିସ୍ଫୋରଣ
ନୀଳଗିରି (ବଡ଼ ଖବର ବ୍ୟୁରୋ): ଡ୍ୟୁଟି ସାରି ସକାଳେ ବାହାରୁଥିବା ବେଳେ ଘଟିଲା ଭୟଙ୍କର ଦୁର୍ଘଟଣା। ପେଟ୍ରୋଲ ପମ୍ପର ପୁରୁଣା ଟାଙ୍କି କାଟିବା ସମୟରେ ହେଲା ବିସ୍ଫୋରଣ। ବିସ୍ଫୋରଣରେ ଚାଲିଗଲା ଜଣେ କର୍ମଚାରୀଙ୍କ ଜୀବନ। ଏଭଳି ଏକ ଦୁଃଖଦ ଘଟଣା ଘଟିଛି ବାଲେଶ୍ୱର ଜିଲ୍ଲା ନୀଳଗିରି ବସ୍ଷ୍ଟାଣ୍ଡ ନିକଟସ୍ଥ ସତ୍ୟସାଇ ଫିଲିଂ ଷ୍ଟେସନ୍ରେ। ହିନ୍ଦୁସ୍ଥାନ ପେଟ୍ରୋଲିୟମ୍ କମ୍ପାନୀ ପକ୍ଷରୁ ପେଟ୍ରୋଲ ପମ୍ପକୁ ନୂଆ ରୂପ ଦେବା ପାଇଁ କାର୍ଯ୍ୟ ଚାଲିଥିଲା।
ଏହି ସମୟରେ ପୁରୁଣା ଟାଙ୍କିକୁ କାଟିବା ବେଳେ ଟାଙ୍କି ଭିତରେ ଗ୍ୟାସ୍ ସୃଷ୍ଟି ହୋଇ ବିସ୍ଫୋରଣ ଘଟିଥିବା ସୂଚନା ମିଳିଛି। ବିସ୍ଫୋରଣ ଏତେ ଭୟଙ୍କର ଥିଲା ଯେ, ଟାଙ୍କିର ଏକ ଅଂଶ ଛିଟିକି ଯାଇ ଶୌଚାଳୟରୁ ବାହାରୁଥିବା ଜଣେ ପେଟ୍ରୋଲ ପମ୍ପ କର୍ମଚାରୀଙ୍କ ଦେହରେ ବାଜିଥିଲା । ଫଳରେ ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ଘଟିଥିଲା। ଏହି ଘଟଣା ପରେ ମୃତ କର୍ମଚାରୀଙ୍କ ସମ୍ପର୍କୀୟମାନେ ମୃତଦେହକୁ ରାସ୍ତା ଉପରେ ରଖି ରାସ୍ତାରୋକ କରିଥିଲେ। ଘଟଣାସ୍ଥଳରେ ପୋଲିସ ଓ ସ୍ଥାନୀୟ ପ୍ରଶାସନ ପହଞ୍ଚି ପରିସ୍ଥିତିକୁ ଶାନ୍ତ କରିବା ସହ ଉତ୍ତ୍ୟକ୍ତ ସମ୍ପର୍କୀୟଙ୍କୁ ବୁଝାସୁଝା କରୁଥିବା ଜଣାପଡ଼ିଛି।