ସାଲେପୁର (ବଡ଼ ଖବର ବ୍ୟୁରୋ): ଜନମଙ୍ଗଳ ରାଷ୍ଟ୍ରରେ ଆଇନ ସମସ୍ତଙ୍କ ପାଇଁ ସମାନ । କିନ୍ତୁ ଜଣେ ଦିବ୍ୟାଙ୍ଗ ବୃଦ୍ଧ ପକ୍କାଘର ଖଣ୍ଡେ ପାଇଁ ସରପଞ୍ଚଙ୍କଠାରୁ ଆରମ୍ଭ କରି ବ୍ଲକ ପ୍ରଶାସନ ପର୍ଯ୍ୟନ୍ତ ଗୁହାରୀ କଲେବି କେହି ଶୁଣୁନାହାନ୍ତି । ସତେ ଯେପରି ପ୍ରଶାସନ ଓ ରାଜନେତାଙ୍କ ସଲାସୁତରାରେ ବଳିପଡିଯାଉଛନ୍ତି ଏହି ଅସହାୟ ବ୍ୟକ୍ତି । ଏଭଳି ଏକ ଘଟଣା ସାମ୍ନାକୁ ଆସିଛି କଟକ ଜିଲ୍ଲା ସାଲେପୁର ବ୍ଲକ ଅନ୍ତର୍ଗତ ମଧ୍ୟକଛ ପଂଚାୟତ ବାରଗୋଡ଼ିଆ ଦଳେଇସାହିରୁ।
ପାଲ ପଡ଼ିଥିବା ଘରେ ରୁହନ୍ତି ଧ୍ରୁଵଙ୍କ ପରିବାର। ଘରକୁ ଦେଖିଲେ ସରକାର ଥିବାଭଳି ମନେହେଉ ନାହିଁ । ଏହି ନୁଆଁଣିଆ ଘରେ ପରିବାର ସହ ଜୀବନ କାଟୁଛନ୍ତି ଦିବ୍ୟାଙ୍ଗ ଧ୍ରୁଵ। ଆଉ ଧ୍ରୁଵଙ୍କ ତିନିଚାକିଆ ସାଇକେଲ ହେଉଛି ଏକମାତ୍ର ସାଥୀ । ଧ୍ରୁଵ ଚା’ ବିକି ପରିବାର ଚଳାନ୍ତି । ଘରକାମ ସାରି ତାଙ୍କୁ ଚା’ ଦୋକାନରେ ସାହାଯ୍ୟ କରନ୍ତି ତାଙ୍କ ସ୍ତ୍ରୀ । ପଡ଼ୋଶୀମାନେ ମଧ୍ୟ ଏହି ଦମ୍ପତିଙ୍କୁ କେବେ ଅବହେଳା କରିବାର କେହି ଦେଖିନାହାନ୍ତି । ରହିବାପାଇଁ ଧ୍ରୁଵଙ୍କୁ ତୁରନ୍ତ ପକ୍କାଘର ଖଣ୍ଡେ ଯୋଗାଇ ଦେବାକୁ ଦାବି କରିଛନ୍ତି ପଡ଼ୋଶୀ। ସରପଞ୍ଚ କହିଛନ୍ତି, ଖୁବଶୀଘ୍ର ଧ୍ରୁବ ପାଇବେ ପକ୍କାଘର ।
