ଔଷଧ ଦୋକନୀଙ୍କୁ ମରଣାନ୍ତକ ଆକ୍ରମଣ
ସୋର (ବଡ଼ ଖବର ବ୍ୟୁରୋ): ଔଷଧ ଦୋକନୀଙ୍କୁ ମାରଣାନ୍ତକ ଆକ୍ରମଣ କଲେ ଦୁର୍ବୃତ୍ତ । ବାଲେଶ୍ୱର ଜିଲ୍ଲା ସୋର ଥାନା କୋଚିଆକୋଇଲି ଅଞ୍ଚଳରୁ ଆସିଛି ଏଭଳି ଘଟଣା । ସୋର ପୌରପାଳିକା କାର୍ଯ୍ୟାଳୟ ଆଗରେ ନରେନ୍ଦ୍ର ଦାଶଙ୍କ ଆୟୁର୍ବେଦିକ ଔଷଧ ଦୋକାନ ରହିଛି । ମଙ୍ଗଳବାର ସନ୍ଧ୍ୟାରେ ଦୋକାନ ବନ୍ଦ କରି ନରେନ୍ଦ୍ର ଘରକୁ ଫେରୁଥିବା ବେଳେ କୋଚିଆକୋଇଲି ପଡ଼ିଆ ନିକଟରେ ତିନିଜଣ ଯୁବକ ତାଙ୍କୁ ଅଟକାଇଥିଲେ । ସେ ରହିବା ପରେ ଟଙ୍କା ଛଡାଇବାକୁ ଉଦ୍ୟମ କରିଥିଲେ ଦୁର୍ବୃତ୍ତମାନେ । ନରେନ୍ଦ୍ର ପ୍ରତିବାଦ କରିବାରୁ ଦୁର୍ବୃତ୍ତମାନେ ଧାରୁଆ ଅସ୍ତ୍ରରେ ତାଙ୍କୁ ଆକ୍ରମଣ କରିଥିଲେ ।
ନରେନ୍ଦ୍ରଙ୍କ ଚିତ୍କାର ଶୁଣି ସ୍ଥାନୀୟ ଲୋକ ଦୌଡି ଆସିବାରୁ ଡକାୟତ ମାନେ ଖସିଯିବାକୁ ଉଦ୍ୟମ କରୁଥିଲେ । ସ୍ଥାନୀୟ ଲୋକ ଜଣକୁ କାବୁ କରି ନେଇଥିଲେ । ଦୁର୍ବୃତ୍ତର ହାତ ବାନ୍ଧି ଉତ୍ତମ ମଧ୍ୟମ ଦେଇଥିଲେ ଲୋକେ। ଖବର ପାଇ ସୋର ପୋଲିସ ଘଟଣାସ୍ଥଳରେ ପହଞ୍ଚି ଅଭିଯୁକ୍ତକୁ ଉଦ୍ଧାର କରିଥିଲା । ଅଭିଯୁକ୍ତକୁ ପଚରା ଉଚରା କରୁଛି ପୋଲିସ ।