ବରୀରେ ଜମୁଛି ପ୍ରଚାର, ବିଜେଡି ପ୍ରାର୍ଥୀଙ୍କ ପ୍ରଚାରରେ ଷ୍ଟାର କ୍ୟାମ୍ପେନର
ବରୀ (ବଡ଼ ଖବର ବ୍ୟୁରୋ): ନିର୍ବାଚନ ତାରିଖ ଯେତିକି ପାଖେଇ ଆସୁଛି ପ୍ରଚାର ମଇଦାନ ସେତିକି ସରଗରମ ହେଉଛି। ବରୀ ନିର୍ବାଚନମଣ୍ଡଳିର ବିଜେଡି ବିଧାୟକ ପ୍ରାର୍ଥୀ ବିଶ୍ୱ ରଞ୍ଜନ ମଲ୍ଲିକ ଗୁରୁବାର ଅପରାହ୍ନରେ ଏକ ବିରାଟ ପଟୁଆରରେ ରାମଚନ୍ଦ୍ରପୁର ଦୁର୍ଗା ପଡିଆରୁ ବାହାରି ବରୀ, ଅରଙ୍ଗାବାଦ, ରମ୍ପା, ଅଟିରା ପଂଚାୟତରେ ନିର୍ବାଚନ ପ୍ରଚାର ସହିତ ରୋଡ଼ ଶୋ କରିଥିବା ଦେଖିବାକୁ ମିଳିଛି। ଏହି ରୋଡ଼ ଶୋ’ରେ ଓଲିଉଡର ଲୋକପ୍ରିୟ ଅଭିନେତା ଯୋଡି ସବ୍ୟସାଚି ଓ ଅର୍ଚ୍ଚିତା ଯୋଗ ଦେଇ ବିଜେଡି ପାଇଁ ପ୍ରଚାର କରୁଥିବା ବେଳେ ଯୋଡ଼ି ଶଙ୍ଖରେ ଭୋଟ ଦେବାକୁ ଜନ ସାଧରଣଙ୍କୁ ଅନୁରୋଧ କରିଥିଲେ।
ରାସ୍ତାର ଉଭୟ ପାର୍ଶ୍ୱରେ ହଜାର ହଜାର ସଂଖ୍ୟାରେ ମହିଳା, ପୁରୁଷ ବିଶେଷ କରି ଯୁବ ବର୍ଗ ଉପସ୍ଥିତ ରହି ପୁଷ୍ପ ବୃଷ୍ଟି କରୁଥିବା ଦେଖିବାକୁ ମିଳିଥିଲା। ଏହି କାର୍ଯ୍ୟକ୍ରମରେ ବ୍ଲକ ଅଧକ୍ଷ ଅଶୋକ କୁମାର ଗେଡି, ଉପାଧକ୍ଷା ଅର୍ଚ୍ଚନା ମଲ୍ଲିକ, ଜିଲ୍ଲା ପରିଷଦ ସଭ୍ୟ ଅଶୋକ ସାମଲ, ସନ୍ତୋଷ ସାମଲ,ଦିଲ୍ଲୀପ ମହାନ୍ତି, ସମସ୍ତ ସରପଞ୍ଚ,ସମିତି ସଭ୍ୟ ସଭ୍ୟା ସମେତ ହଜାର ହଜାର ବିଜେଡି କର୍ମୀ ଓ ଜନ ସାଧାରଣ ଯୋଗଦେଇଥିବା ବେଳେ ବିଧାୟକ ପ୍ରାର୍ଥୀ ବିଶ୍ବରଂଜନ ମଲ୍ଲିକ ଯୋଡ଼ି ଶଙ୍ଖରେ ଭୋଟ ଦେବାକୁ ଜନ ସାଧାରଣଙ୍କୁ ଅନୁରୋଧ କରୁଥିବା ଦେଖିବାକୁ ମିଳିଛି।