ମେଣ୍ଟକୁ ନେଇ ଜୁଏଲ କହିଲେ ଦ୍ୱନ୍ଦ ନାହିଁ, ନୃସିଂହ କହିଲେ ଖବର ନାହିଁ
ଭୁବନେଶ୍ୱର (ବଡ଼ ଖବର ବ୍ୟୁରୋ): ମୁଣ୍ଡ ଉପରେ ସାଧାରଣ ନିର୍ବାଚନ । ଏନେଇ ତାରିଖ ଘୋଷଣା ମଧ୍ୟ ହୋଇସାରିଛି । ହେଲେ ଓଡ଼ିଶାରେ ବିଜେପି-ବିଜେଡି ମଧ୍ୟରେ ମେଂଟ ଚର୍ଚ୍ଚା ଥମିବାର ନାଁ ଧରୁନାହିଁ । ବିଜେପିର ରାଜ୍ୟ ନେତୃତ୍ୱ ସ୍ପଷ୍ଟ ଭାବେ ମେଂଟ ହେବ ନାହିଁ ବୋଲି କହିଆସୁଛନ୍ତି ।
ସେପଟେ ଗୃହମନ୍ତ୍ରୀ ଅମିତ ଶାହ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା ଓ ପ୍ରଧାନମନ୍ତ୍ରୀଙ୍କ ଏ ବିଷୟରେ ଆଲୋଚନା କରୁଥିବା କହିଛନ୍ତି । ହେଲେ ବିଜେଡି ପକ୍ଷରେ ଏନେଇ କୌଣସି ସ୍ପଷ୍ଟୀକରଣ ଆସୁନାହିଁ । ଏହାକୁ ନେଇ ଆଜି ସୁନ୍ଦରଗଡ଼ ସାଂସଦ ତଥା ବରିଷ୍ଠ ବିଜେପି ନେତା ଜୁଏଲ ଓରାମ କହିଛନ୍ତି ଯେ ମେଂଟକୁ ନେଇ କୌଣସି ଦ୍ୱନ୍ଦ ନାହିଁ ।
ବିଜେପି କୋର କମିଟି ଓ ନିର୍ବାଚନ କମିଟି ଟିକେଟ କସରତ ପରେ କେନ୍ଦ୍ରକୁ ତାଲିକା ପଠାଯାଇଛି । କେନ୍ଦ୍ର ଏନେଇ ନିଷ୍ପତ୍ତି ନେବ । ସେପଟେ ମେଂଟ ବାବଦରେ ମତ ରଖିଛନ୍ତି ବରିଷ୍ଠ ବିଜେଡି ନେତା ନୃସିଂହ ସାହୁ । କହିଛନ୍ତି ମେଣ୍ଟ ବାବଦରେ ଆମ ପାଖରେ ଖବର ନାହିଁ । ସବୁ ଥର ଯେମିତି ମାନ୍ୟବର ନବୀନ ପଟ୍ଟନାୟକ ନିଷ୍ପତ୍ତି ନେଇ ଟିକେଟ ଦିଅନ୍ତି ସେଭଳି ଭାବରେ ଟିକେଟ ବଣ୍ଟନ ହେବ ।