ଚାରିଧାମ ଯାତ୍ରାରେ ଭିଆଇପି ଦର୍ଶନ, ରିଲ୍ସ ଏବଂ ଭିଡିଓ ବନାଇବା ନିଷେଧ

ଉତ୍ତରାଖଣ୍ଡ (ବଡ଼ ଖବର ବ୍ୟୁରୋ): ଚାରିଧାମ ମନ୍ଦିର ପରିସରରେ ରିଲ୍ସ, ଭିଡିଓ ବନାଇବା ଉପରେ ଲାଗିଲା ପ୍ରତିବନ୍ଧକ । ଚାରିଧାମ ଯାତ୍ରା କରୁଥିବା ତୀର୍ଥଯାତ୍ରୀଙ୍କ ସଂଖ୍ୟା ବୃଦ୍ଧିକୁ ଦୃଷ୍ଟିରେ ରଖି ଉତ୍ତରାଖଣ୍ଡ ସରକାର ଏହି ପ୍ରତିବନ୍ଧକ ଲଗାଇଛନ୍ତି । ଏଥିସହିତ ଭିଆଇପି ଦର୍ଶନ ଉପରେ ରୋକକୁ ମେ ୩୧ ଯାଏଁ ବଢ଼ିଯାଇଛି। ଉତ୍ତରାଖଣ୍ଡ ମୁଖ୍ୟ ଶାସନ ସଚିବ ରାଧା ରାଉତ୍ରୀ ରାଜ୍ୟର ସମସ୍ତ ମୁଖ୍ୟ ସଚିବଙ୍କୁ ଲେଖିଥିବା ପତ୍ରରେ କହିଛନ୍ତି ଯେ ଚଳିତ ବର୍ଷ ଉତ୍ତରାଖଣ୍ଡର ପବିତ୍ର ଚାର୍ ଧାମ ପରିଦର୍ଶନ କରୁଥିବା ତୀର୍ଥଯାତ୍ରୀଙ୍କ ସଂଖ୍ୟାରେ କ୍ରମାଗତ ବୃଦ୍ଧି ଘଟିଛି। ଉନ୍ନତ ପରିଚାଳନା ପାଇଁ, ମେ ୩୧ ପର୍ୟ୍ୟନ୍ତ କୌଣସି ଭିଆଇପି ଦର୍ଶନ “ନକରିବାକୁ ନିଷ୍ପତ୍ତି ନେଇଛୁ । ଚାର ଧାମ ଯାତ୍ରା ସୁରୁଖୁରୁରେ ପରିଚାଳିତ ହେଉଛି।

ତୀର୍ଥଯାତ୍ରୀମାନଙ୍କ ପାଇଁ ଏକ ବ୍ୟବସ୍ଥିତ ଦର୍ଶନ ନିଶ୍ଚିତ କରିବାକୁ ବ୍ୟବସ୍ଥା କରାଯାଇଛି। ମନ୍ଦିର ପରିସରରେ ସୋସିଆଲ ମିଡିଆ ପାଇଁ ଭିଡିଓଗ୍ରାଫି ଏବଂ ରିଲ ନିର୍ମାଣ କରାଯାଉଛି, ଯାହାଦ୍ୱାରା ଭିଡ଼ ଜମା ହୋଇ ଭକ୍ତମାନଙ୍କ ପାଇଁ ଅସୁବିଧା ସୃଷ୍ଟି ହେଉଛି । ଏହାର ସମାଧାନ ପାଇଁ ଭକ୍ତମାନଙ୍କ ସୁବିଧାକୁ ଦୃଷ୍ଟିରେ ରଖି ଚାର୍ ଧାମରେ ଥିବା ମନ୍ଦିର ପରିସରର ୫୦ ମିଟର ବ୍ୟାସାର୍ଦ୍ଧରେ ସୋସିଆଲ୍ ମିଡିଆ ପାଇଁ ଭିଡିଓଗ୍ରାଫି ଏବଂ ରିଲ୍ ସମ୍ପୂର୍ଣ୍ଣ ନିଷେଧ କରାଯାଇଛି । ସେହିପରି ସରକାର ଯାତ୍ରାର ଅଫଲାଇନ୍ ପଞ୍ଜୀକରଣ ଲାଗି ହରିଦ୍ଵାର ଓ ଋଷିକେଶରେ ଥିବା କାଉଣ୍ଟରକୁ ମଧ୍ୟ ୩ ଦିନ ଲାଗି ବନ୍ଦ କରିଦେଇଛନ୍ତି। ରିପୋର୍ଟ ଅନୁସାରେ, ଋଷିକେଶ ଓ ହରିଦ୍ଵାରରେ ଶ୍ରଦ୍ଧାଳୁମାନଙ୍କର ଲଗାତର ପ୍ରବଳ ମାତ୍ରାରେ ଭିଡ଼ ଦେଖିବାକୁ ମିଳୁଛି। ସେଥିଯୋଗୁ ଲୋକେ ପଞ୍ଜୀକରଣ ନ କରାଇ ସିଧାସଳଖ ଚାରିଧାମ ଦର୍ଶନ କରିବା ଲାଗି ପହଞ୍ଚି ଯାଉଛନ୍ତି। ଏହାଦ୍ଵାରା ଚାରିଧାମରେ ଭିଡ଼ ନିୟନ୍ତ୍ରଣରେ ସମସ୍ୟା ହେଉଛି । ତେଣୁ ପ୍ରଶାସନ ବାଧ୍ୟହୋଇ ଅଫଲାଇନ୍ ପଞ୍ଜୀକରଣକୁ ବନ୍ଦ କରିଛନ୍ତି।