କଳାହାଣ୍ଡି (ବଡ଼ ଖବର ବ୍ୟୁରୋ): ବିନା ଭକ୍ତରେ ପ୍ରଥମ ଥର ପାଇଁ କଳାହାଣ୍ଡି ଅଧିଷ୍ଠାତ୍ରୀ ଦେବୀ ମା’ ମାଣିକେଶ୍ୱରୀଙ୍କ ଛତରଯାତ୍ରା ଅନୁଷ୍ଠିତ ହୋଇଛି । ପ୍ରାତଃ ୫.୨୦ ମିନିଟରେ ମା’ଙ୍କ ଛତର ଜେନାଖାଲଠାରୁ ବାହାରି ୬.୧୦ ମିନିଟରେ ମା’ଙ୍କ ମୂଳ ଆସ୍ଥାନ ମାଣିକେଶ୍ୱରୀ ମନ୍ଦିରକୁ ପ୍ରବେଶ କରିଥିଲା ।
ଛତରଯାତ୍ରାରେ ସାମିଲ ହେବାକୁ ରାଜ୍ୟ ତଥା ରାଜ୍ୟ ବାହାରରୁ ଲକ୍ଷ ଲକ୍ଷ ଶ୍ରଦ୍ଧାଳୁ ଭବାନୀପାଟଣା ସହରକୁ ଛୁଟି ଆସନ୍ତି । କରୋନା ପାଇଁ ବିଶ୍ୱ ପ୍ରସିଦ୍ଧ ଛତରଯାତ୍ରା ବିନା ଭକ୍ତରେ ଅନୁଷ୍ଠିତ ହୋଇଛି । କେବଳ ପରମ୍ପରା ଓ ରୀତିନୀତି ପାଳନ ମଧ୍ୟରେ ସୀମିତ ରହିଥିଲା ଚଳିତ ବର୍ଷର ଛତରଯାତ୍ରା । ବିଗତ ବର୍ଷଗୁଡ଼ିକରେ ମାନସିକଧାରୀଙ୍କ ପଶୁ,ପକ୍ଷୀ ବଳିରେ ରାଜରାସ୍ତା ରକ୍ତ ରଞ୍ଜିତ ହୋଇଥାଏ । ମାତ୍ର ଚଳିତ ବର୍ଷ ସବୁ ଖାଁ ଖାଁ ଲାଗୁଥିଲା । ମା’ ମାଣିକେଶ୍ୱରୀ ଦର୍ଶନ ନପାଇ ଭକ୍ତ ନିରାଶ ହୋଇଛନ୍ତି । ହେଲେ ମା’ଙ୍କ ଉଦ୍ଦେଶ୍ୟରେ ଆକୁଳ ନିବେଦନ ଜଣାଇଛନ୍ତି ଶ୍ରଦ୍ଧାଳୁ । ଅପେକ୍ଷା ଆର ବରଷକୁ । କରୋନା ଛାଡିବ,ପୁଣି ଛତର ଯାତ୍ରାରେ ଭିଡ଼ ଜମିବ ।
କୋଭିଡ ଗାଇଡଲାଇନକୁ ସମ୍ମାନ ଜଣାଇ ଲୋକେ ରାଜରାସ୍ତାରେ ବଳି ଦେଇ ନ ଥିଲେ । ମାତ୍ର ଘରେ ଘରେ ବଳିପ୍ରଥା ପାଳନ କରିଛନ୍ତି । ମା’ଙ୍କ ଉଦ୍ଦେଶ୍ୟରେ ଧୂପ, ଦୀପ, ନୈବେଦ୍ୟ ତଥା ଶାନ୍ତିର ପ୍ରତୀକ କପୋତ ଉଡାଇ ପରମ୍ପରା ପାଳନ କରିଛନ୍ତି ଭକ୍ତ । କରୋନା ସଂକ୍ରମଣର ମୁକାବିଲା ସହ ପରମ୍ପରା ବଜାୟ ରଖିବାରେ ଜନସାଧାରଣ ସହଯୋଗ କରିଥିବାରୁ ଜିଲ୍ଲା ପ୍ରଶାସନ ସମସ୍ତଙ୍କୁ ଜଣାଇଛି ଧନ୍ୟବାଦ ।
