ନୂଆଦିଲ୍ଲୀ (ବଡ଼ ଖବର ବ୍ୟୁରୋ): କଂଗ୍ରେସ ନେତା ପଓ୍ୱନ ଖେଡାଙ୍କ ଗିରଫଦାରୀକୁ ନେଇ ନାଟକୀୟ ମୋଡ଼ । ପ୍ରଥମେ ଗିରଫ ପରେ ଜାମିନ । ସୁପ୍ରିମକୋର୍ଟରୁ ତାଙ୍କୁ ଅନ୍ତରୀଣ ସୁରକ୍ଷା ମିଳିଛି । ପ୍ରଥମେ ଖବର ଆସିଥିଲା, ଗିରଫ ହେଲେ କଂଗ୍ରେସ ନେତା ପୱନ ଖେଡ଼ା । ଆସାମ ପୋଲିସ ଦିଲ୍ଲୀ ବିମାନବନ୍ଦରରେ ପୱନ ଖେଡ଼ାଙ୍କୁ ଗିରଫ କରିଛି। ଗୁରୁବାର ପୱନ ଅନ୍ୟ ଦଳୀୟ ନେତାଙ୍କ ସହ ରାୟପୁରରେ ଆୟୋଜିତ ଅଧିବେଶନରେ ଯୋଗଦେବାକୁ ଯାଉଥିଲେ। ଦିଲ୍ଲୀ ବିମାନବନ୍ଦରରେ ତାଙ୍କୁ ଗିରଫ କରାଯାଇଛି। ତାଙ୍କୁ ଦିଲ୍ଲୀ କୋର୍ଟରେ ହାଜର କରାଯିବା ରିମାଣ୍ଡରେ ଆସାମକୁ ନିଆଯିବ ବୋଲି ସୂଚନା ମିଳିଛି। ନିୟମ ଅନୁଯାୟୀ ଆସାମ ପୋଲିସର ଆବେଦନ ଉପରେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି ବୋଲି ଦିଲ୍ଲୀ ପୋଲିସ ଦାବି କରିଛି।
କୁହାଯାଉଛି ଯେ, ପୱନ ଦିଲ୍ଲୀରୁ ରାୟପୁର ବିମାନରେ ବସିଥିଲେ। ତାଙ୍କୁ ହଠତ୍ ଓହ୍ଲାଇବାକୁ କୁହାଯାଇଥିଲା ଏବଂ ପରେ ଗିରଫ କରାଯାଇଥିଲା। ଆସାମ ପୋଲିସର ଆଇଜିପି ପ୍ରଶାନ୍ତ କୁମାର ଭୁୟାଁ କହିଛନ୍ତି, ଆସାମର ଡିମା ହସାଓ ଜିଲାର ହାଫଲଙ୍ଗ ପୋଲିସ ଷ୍ଟେଶନରେ ପୱନଙ୍କ ବିରୋଧରେ ଏକ ମାମଲା ରୁଜୁ ହୋଇଛି। ଏହି ମାମଲାରେ ଆସାମ ପୋଲିସର ତାଙ୍କୁ ଗିରଫ କରିଛି। ସେପଟେ ଖେଡ଼ାଙ୍କ ଗିରଫଦାରୀକୁ କଂଗ୍ରେସ ବିରୋଧ କରିଛି। ପୱନ ଗିରଫ ହେବା ପରେ କଂଗ୍ରେସ ନେତାମାନେ ବିମାନବନ୍ଦରରେ ଧାରଣାରେ ବସିଥିଲେ । ଏହାପରେ ସୁପ୍ରିମକୋର୍ଟଙ୍କ ରାୟ ଆସିଥିଲା ।
