ପିସିଆର୍ ନଜରରୁ ଖସିଲା, ପବ୍ଲିକ୍ ହାତରେ ଫସିଲା
କଟକ (ବଡ଼ ଖବର ବ୍ୟୁରୋ) ପୋଲିସ ଧରି ପାରିଲେ ନାହିଁ, ପବ୍ଲିକ୍ ଧରି ପୋଲିସକୁ ଦେଲେ । ପିସିଆର୍ ନଜର ରୁ ଖସିଲା ପବ୍ଲିକ୍ ହାତରେ ଫସିଲା । ସକାଳେ ଘର ଚିହ୍ନଟ, ରାତିରେ ଚୋରୀ । ଦିନରେ ଘର ଖୋଜି ମାର୍କ କରାହେବ । ରାତି ହେଲେ ସେଇ ଘରୁ ଲୁଟ୍ ହେବ । କଟକ ରାଣୀହାଟ ଶଗଡ଼ିଆ ସାହି ଅଞ୍ଚଳରେ ଦୀର୍ଘ ଦୁଇ ମାସରୁ ଉର୍ଦ୍ଧ୍ବ ହେବ ଏଭଳି ଚୋରି ଉପଦ୍ରବ ମଚାଇଥିଲେ ଦୁଇ ଚୋର । ତେବେ ଆଜି ସକାଳ ସମୟରେ ଘର ଟେର୍ ପାଇଁ ଆସି ଫସିଗଲା ଚୋର ଜୟନ୍ତ । ଏବେବି ଫେରାର ଅଛି ସାଥି ମହେଶ ।
ଦୀର୍ଘ ଦୁଇ ମାସ ହେଲା ରାଣୀହାଟ ଶଗଡ଼ିଆ ସାହି ଅଞ୍ଚଳରେ ସାହି ବାସିନ୍ଦାଙ୍କ ନିଦ ହଜାଇ ଦେଇଥିଲେ ଏହି ଦୁଇ ଚୋର । ଆଉ ଆଜି ସ୍ଥାନୀୟ ଲୋକେ କାବୁ କରିବା ପରେ ମଙ୍ଗଳାବାଗ ଥାନାର ଜଣେ ଚୋରକୁ ଜିମା ଦେଇଛନ୍ତି । ତେବେ ଧରା ପଡ଼ିଥିବା ଚୋର ଜଣକର ଘର ଢେଙ୍କାନାଳ ଜିଲ୍ଲାରେ ହୋଇଥିବା ବେଳେ ସେ କଟକ ରାଣୀହାଟ୍ ତେଲି ସାହିରେ ଘର ଭଡ଼ା ନେଇ ରହୁଥିଲା । ଅନ୍ୟପଟେ ମଙ୍ଗଳାବାଗ ଥାନା ପୋଲିସକୁ ଉକ୍ତ ଚୋର ଦେଖାଇଛି କିଭଳି ରେକି କରି ପରେ ଆସି ଲୁଟ୍ କରନ୍ତି । ଦେଖିବାକୁ ବାକି ରହିଲା ପୋଲିସ କ’ଣ ପଦକ୍ଷେପ ଗ୍ରହଣ କରୁଛି ।