ତୈଳ ବିଶୋଧାନାଗାରକୁ ଅର୍ଥନୈତିକ ସ୍ତରରେ ଅବରୋଧ ଚେତାବନୀ

ପାରାଦୀପ (ବଡ଼ ଖବର ବ୍ୟୁରୋ): ଶ୍ରମିକଙ୍କ ଦାବି ନ ମାନିଲେ ଆଗାମୀ ଦିନରେ ତୈଳ ବିଶୋଧାନାଗାରକୁ ସମ୍ପୂର୍ଣ ଭାବରେ ଅର୍ଥନୈତିକ ସ୍ତରରେ ଅବରୋଧ କରାଯିବ । ଏହି ଚେତାବନୀ ଦେଇଛି ତୈଳ ବିଶୋଧାନାଗାରରେ କାର୍ଯ୍ୟରତ ଶ୍ରମିକ ସଂଗଠନ । ପାରାଦୀପ ତୈଳବିଶୋଧନାଗାରରେ ଶ୍ରମିକଙ୍କ ନ୍ୟାୟ ଦାବିକୁ ନେଇ ହେଉଥିବା ଅବହେଳାର ପ୍ରତିବାଦ କରିଛନ୍ତି ଶ୍ରମିକ ସଂଗଠନ ପେଟ୍ରୋଲିୟମ ପ୍ରଡକ୍ଟସ ଆଣ୍ଡ ହ୍ୟାଣ୍ଡଲିଙ୍ଗ କ୍ୟାରିଅର୍ସ ଶ୍ରମିକ ସଂଗଠନ ।

ଦୀର୍ଘଦିନ ଧରି କରୋନା ମହାମାରୀ କାରଣରୁ କୌଣସି କଂପାନୀ ମାନଙ୍କୁ ଶ୍ରମିକ ମାନଙ୍କ ଦାବି ଉପସ୍ଥାପନ କରାଯାଇନଥିଲା । ତେବେ ଶ୍ରମିକ ସଂଗଠନ ତରଫରୁ ଆଞ୍ଚଳିକ ଶ୍ରମ କମିଶନରଙ୍କ ପାଖରେ ଶ୍ରମିକ ମାନଙ୍କ ବିଭିନ୍ନ ମୌଳିକ ସମସ୍ୟା ଯଥା କ୍ୟାଣ୍ଟିନ ସୁବିଧା, ଗାଡି ପାର୍କିଙ୍ଗ ସୁବିଧା ଏହିପରି ୧୩ ଦଫା ଦାବି ବିଷୟରେ ଅବଗତ କରାଯାଇଥିଲା । ତେବେ ଶ୍ରମ କମିଶନରଙ୍କ ବାରମ୍ବାର ତୈଳବିଶୋଧାନାଗାର ଓ କଣ୍ଟ୍ରାକ୍ଟରମାନଙ୍କୁ ଆଲୋଚନା ପାଇଁ ଡାକିଥିଲେ ମଧ୍ୟ କାହାର ଦେଖା ନ ମିଳିବା କାରଣରୁ ଆଞ୍ଚଳିକ ଶ୍ରମ କମିଶନର ପଦୋନ୍ନତି କାରଣରୁ ବଦଳି ହୋଇଯିବାରୁ ପାରାଦୀପରେ ଥିବା ଶ୍ରମ କାର୍ଯ୍ୟନିର୍ବାହୀ ଅଧିକାରୀଙ୍କୁ ଏହି ଘଟଣା ବିଷୟରେ ସମ୍ପୂର୍ଣ ତଦନ୍ତ କରି ସମସ୍ୟା ସମାଧାନ କରିବାକୁ ନିର୍ଦ୍ଦେଶ ଆସିଥିଲା ।

ଆଗାମୀ ଦିନରେ ଶ୍ରମିକ ସଂଗଠନ ତରଫରୁ ଏହାର ଉଚିତ ଜବାବ ଦିଆଯିବା ସହିତ ତୈଳବିଶୋଧାନାଗାରକୁ ସମ୍ପୂର୍ଣ ଭାବରେ ଅବରୋଧ କରାଯିବ ଏବଂ ଏଥିପାଇଁ ତୈଳବିଶୋଧାନାଗାର କର୍ତ୍ତୃପକ୍ଷ ଦାୟୀ ରହିବେ ବୋଲି ଶ୍ରମିକ ସଂଗଠନ ତରଫରୁ ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି।